Kristen pakistanar dømd til døden for blasfemi

I slutten av mai vart Noman Masih dømd til døden ved henging. Det skjedde i ein domstol i provinsen Punjab.

Skuldinga var at han 1. juli 2019 hadde vist ei blasfemisk karikaturteikning til fleire personar i ein familiepark. Han skal også ha formidla teikninga vidare til grupper på appen WhatsApp.

Advokat: Svært skuffa

Politiet arresterte han og sende han i fengsel. Det tok nesten fire år før dommen fall.

– Eg er svært skuffa over dommen, seier advokaten Lazar Allah Rakha i ein kommentar som Stefanusalliansen har fått tilgang til og formidla til Dagen.

Advokaten meiner skuldingane ikkje er dokumenterte, men tvert imot strir med det ein kan prove. Og han kallar han «eit perverst stigma» for rettssystemet i Pakistan.

– Eg har anka dommen mot Noman Masih inn for ein høgare domstol og eg har håp om at han vil verte ytt rettferd og vere fri ein dag, seier Rakha vidare.

Vanskeleg for familien

Faren til Noman, Asghar Masih, fortel til den pakistanske avisa Kross Konnection at familien er sjokkert over dommen. Han kallar skuldingane grunnlause. Og han hevdar at sonen sov i huset då politiet skuldar han for å ha vist blasfemiske bilete til fleire menneske i parken.

Dei siste fire åra har ifølgje faren vore svært krevjande for familien, både kjenslemessig og økonomisk.

– Eg jobbar som reinhaldar på butikk og kan knapt klare utgiftene til hushaldet på den magre løna mi. Heilt sidan Noman vart fengsla, har eg lagt meg opp ei stor gjeld fordi eg har vore nøydd til å bidra til fengselsutgiftene hans på kvart besøk, seier han.

– Gir etter for press

Fleire menneske skal ha blitt drepne ulovleg eller lynsja i Pakistan etter skuldingar om blasfemi, ifølgje Kross Konnection. Så langt har likevel ikkje nokon vorte avretta for blasfemi i landet.

– Dei små domstolane i Pakistan fryktar islamistar og manglar vern og tryggleik. Dei gir ofte etter for press og dømer dei som er utsette for skuldingar, seier den pakistanske journalisten Kiyya Baloch til Dagen.

Han er busett i Noreg og har teke master i global journalistikk ved NLA Høgskolen.

Baloch legg til at høgare domstolar ofte omstøyter dommane.

Minst 2.120 personar er blitt skulda for Blasfemi i Pakistan i tidsrommet 1987 til 2022, ifølgje ein rapport frå Centre for Social Justice i Lahore.

Det store fleirtalet er muslimar eller ahhmadiyar, ei retning av islam som dei fleste muslimar avviser som vranglærande.

Særleg vanleg er fenomenet i nettopp Punjab.

Veit om 28 fengsla kristne

Redaktør Johannes Morken i Stefanusalliansen har vore i kontakt med partnarorganisasjonen dei har i Pakistan, Human Friends Organization (HFO).

– HFO skal betale delar av utgifter til advokat og hjelpe familien med levebrød. Dei har måtta gå i skul fordi dei kan vere angrepsmål, seier Morken til Dagen.

Ifølgje hans opplysingar sit rundt 28 kristne fengsla i Pakistan for blasfemi.

– I det siste er blasfemilova i landet blitt forverra. Både lova og praksisen var ille nok frå før, men no er det stramma endå meir til, seier Morken.

Innskjerpa tidlegare i år

I januar vart det gjort ulovleg å spotte også konene til profeten Muhammed. Strafferamma er livstid i fengsel.

– Korleis er Stafanusalliansen involvert gjennom sine partnarar når kristne vert fengsla og eventuelt dømde for blasfemi?

– Det er tre forskjellige typar bidrag. Det første er støtte til advokat, det andre er eit «safe house» der familien kan bu trygt, og det tredje er advocacy eller lobbyarbeid, svarar Morken.

I perioden 2009 til 2019 var det mykje merksemd rundt den kristne kvinna Asia Bibi som vart skulda for blasfemi. Ho vart dømd til døden ved henging i 2010, men til slutt frikjend av høgsterett i 2018. Året etter slapp ho ut av landet og emigrerte til Canada.

– Det er forholdsvis ofte folk vert arresterte for blasfemi i Pakistan, seier Morken.

Øydelagde liv

Han etterlyser større engasjement mot dette frå både norske styresmakter og menneskerettsorganisasjonar.

–Det sit både kristne, ahmadijaer og moderate muslimar i fengsel. Fleire av dei fengsla kristne, har dødsdom, seier Morken.

Sjølv om ingen er blitt avretta for blasfemi, påpeikar han at slike prosessar ofte endar med øydelagde liv.

– Det finst heller inga straff for å levera falske skuldingar som fører til dødsdom, seier Morken.

Han minner om at mange titals blasfemianklaga er drepne av ekstremistar som ikkje bryr seg om rettsvesen.