Kristne leiarar manar til engasjement mot dødshjelp

Eit forslag frå Lord Falconer skal snart gjennom den andre runden i Overhuset. Og Labour-politikaren Jake Richards skal leggje fram eit representantforslag om legalisering for Underhuset, melder christiantoday.com.

Forsøka på legalisering har også vore omtalt i store internasjonale medium tidlegare i år, som CNN og The Economist.

Noverande statsminister Keir Starmer har tidlegare signalisert at han ser grunnar til å endre lova, men temaet var ikkje nemnt i Kongens tale i juli.

Labour tok over regjeringsmakta etter eit valskred i starten av den same månaden.

Omsorg på slutten

Den katolske biskopen John Sherrington understrekar at Den katolske kyrkja alltid har vore imot dødshjelp i alle tilfelle. Han oppmodar i staden til betre omsorg for dødssjuke menneske på slutten av livet.

– Lat oss i førebuinga til desse debattane be for dei som nærmar seg slutten på livet, at dei kan få omsorga og støtta som dei treng for å leve dei siste dagane sine med respekt for verdet deira, seier biskopen.

Erkebiskop overraska

Leiaren for den kristne lobbyorganisasjonen CARE, Ross Henry, kallar assistert sjølvmord for «medisinsk fargleg og uetisk».

– Det moralske rammeverket som underbyggjer tilnærminga vår til helsetenester i Storbritannia er basert på den kristne trua om at menneske, som er skapte i Guds bilete, har eit medfødd verd og fortener sterkt vern. Verdien til ein person vert ikkje mindre av sjukdom eller nokon annan faktor.

I Storbritannia overraska den tidlegare erkebiskopen av Canterbury, George Carey, med å gå inn for legalisering allereie i 2014. Han har markert seg som konservativ i andre spørsmål. Han meiner det er «djupt kristent» å sørgje for at ingen må lide mot sin vilje.

Fryktar glidebane

For ni år sidan vart eit forslag om liberalisering avvist med stort fleirtal i det britiske parlamentet. Men ei meiningsmåling viste to tredels fleirtal for å tillate praksisen, melde The Guardian i fjor.

Ei rekke vestlege land har legalisert dødshjelp, i aukande tempo, dei siste 20 åra. På forskjellige måtar er det tillate i Nederland, Belgia, Luxemburg, Sveits, Spania, Tyskland, Østerrike, Portugal, Canada, Colombia, New Zealand, alle seks stater i Australia og i elleve stater i USA.

Kritikarar åtvarar mot ein skråplaneffekt der ein gradvis opnar for fleire grunnar til dødshjelp, mellom anna psykisk sjukdom. I Nederland har ein stadig større del av totale årlege dødsfall skjedd med legehjelp sidan legaliseringa i 2001. I fjor utgjorde eutanasi 5,4 prosent av alle dødsfall i landet, ifølgje El Pais.