UVANLEG ÅR: Kyrkjerådsleiar Kristin Gunleiksrud Raaum seier at tala for 2020 er ekstraordinære fordi 2020 var eit ekstraordinært år. Foto: Bo Mathisen / Den norske kyrkja
Kyrkjebesøket halvert
Koronapandemien har ført til at deltakartalet på gudstenester i Den norske kyrkja har gått ned frå 5,2 millionar i 2019 til 2,3 millionar i 2020.
Dette melder Den norske kyrkja i ei pressemelding. Tala viser at deltaking på digitale gudstenester har auka, men har ikkje klart å fanga opp heile fråfallet med ei deltaking på nesten halvannan million.
– Tala for 2020 er ekstraordinære fordi 2020 var eit ekstraordinært år, seier kyrkjerådsleiar Kristin Gunleiksrud Raaum. Ho viser til at kyrkja berre opererte som normalt i ti veker i fjor.
Raaum peikar på at den digitale deltakinga i kyrkjeleg aktivitet har vore høg i 2020, og at dette er ei gledeleg utvikling. Det har vore nesten halvannan million deltakarar på gudstenester som har vorte strøymde på nett.
