Nå har Kyrkjemøtet endeleg bestemt seg

Den såkalla kompromissmodellen vann fram i Kyrkjemøtet med 53 mot 52 stemmer på mandag.

– Me kan ikkje sei at Kyrkjemøtet har samla seg om ei løysing, innrømmer kyrkjerådsleiar Kristin Gunleisrud Raaum i pressekonferansen etter voteringa.

Dette blir annleis

Rettssubjektet Den norske kyrkja (Dnk) og sokna skal begge vere arbeidsgjevarar, slik det er i dag. Det nye er at fellesråda får delegert det utøvande arbeidsgjevaransvaret frå Dnk.

Det har vore stor diskusjon om at nokre fellesråd blir for små til å få delegert arbeidsgjevaroppgåver frå Dnk. Mange frykta at fellesråda derfor må bli slått saman mot eigen vilje.

Det kjem ikkje til å skje.

Komitéen tilrår at fellesråda får bestemme sjølv om dei vil slå seg saman, og tilrår vidare at dei bør stimulerast til å gjere dette i tett dialog med kommunane.

I dag har biskopane styringsrett. Nå som Kyrkjemøtet har vedtatt modell 3 må ansvaret delast på. Det vil seie at den daglege leiinga skal delast likt mellom kyrkjefagleg og administrativ leiar.

Biskopen sitt tilsyn skal utvidast, og på ein ny måte gjelde heile kyrkja, ifølge Kristin Gunleisrud Raaum.

– Mi vurdering er at biskopen sitt leiarskap kjem styrka ut av dette vedtaket, seier ho i pressekonferansen.

Dette er ein siger for Presteforeninga, som har kjempa for modell to, der Kyrkja nasjonalt er arbeidsgjevar for alle.

Usemje til det siste

Kyrkjerådet har frå før gått inn for modell 3. Det same har komiteen som har behandla saka på Kyrkjemøtet.

Likevel var det ikkje gitt at det skulle gå i modell 3 sin favør. Ifølge Vårt Land viste ei prøveavstemming laurdag at Kyrkjemøtet var delt på midten. Debatten før voteringa mandag viste også at tilhengarane av modell to ikkje hadde gitt opp.

Framleis gjenstår ein del før den nye modellen tar til å gjelda. Om eitt år skal Kyrkjemøtet bestemme dei praktiske detaljane for kyrkjeleg organisering.

Mellom anna skal den konkrete utforminga av leiinga greiast ut og leggjast ut på høyring før neste Kyrkjemøte.

Kyrkjerådsleiaren understreker at det er semje i Kyrkjemøtet, trass i eit knappast muleg fleirtal.

– Det er brei semje om at me skal vere ei tilgjengeleg, open kyrkje som deler evangeliet, at me skal ha ei sterk lokalkyrkje der det er attraktivt å arbeide, og som er godt leia.

– Det skal me jobbe vidare med og få gjort endå betre i kyrkja, fastslår Raaum.