Lisa (23) sin ferietur til Alpane i 2014 har resultert i 179.000 kroner til kristent hjelpearbeid

Éin dag, kvar sommar, samlar Lisa Almås (23) og søskenbarnet Heidi Byberg (22) mellom 150 og 200 personar i ein hage på Klepp.

Hagegjestene har to mål for auge:

Smake på dei franske dessertpannekakene til Almås og Byberg og å hjelpe vanskelegstilte i Ukraina.

Jærbladet omtalte saka først.

31. juli i år gjekk hagekafeen av stabelen for åttande gong. 200 gjester åt pannekaker for 40.000 kroner.

Til saman har dei to unge kvinnene samla inn 179.000 kroner på pannekakesal.

Alle inntektene går til Ukraina, men pannekake-tradisjonen starta milevis unna det krigsherja landet, på ein slalåmtur i dei franske alpane.

Fekk ideen i slalåmbakken

Lisa og Heidi, som då var 12 og 13 år gamle, brukte pausane i skibakken til å ete franske dessertpannekaker, kalla crêpe.

Dei var så gode at dei fann ut dei ville prøve å selje crêpes heime også.

Inntektene ville dei gi til hjelpeorganisasjonen KPK-Ukraina.

Bedehus-ungdom ville få tiden til å gå før ferien. Laget familiefestival for hele bydelen

– Vil vise kristen nestekjærleik

KPK-Ukraina har sitt utspring i Norsk Luthersk misjonssamband, men er i dag ei offentleg godkjent humanitær stifting.

Formålet er å hjelpe menneske vest i Ukraina som lever i fattigdom og nød.

Unge vener samla inn 105.000 til misjonen på to kveldar

«Vi ønsker å vise kristen nestekjærleik i praksis, vise omsorg og kjærleik og samtidig utøve distribusjon av nødhjelp», heiter det på organisasjonen si heimeside.

Totalt sett er lønnskostnadane 4,8 prosent, ifølgje KPK-Ukraina.

Resten er frivillig arbeid, slik som det Byberg og søskenbarnet hennar har drive med i åtte år nå.

Starta med kaos

Då Almås og Byberg smakte Nutella-crêpes i dei franske Alpene vinteren 2014 fekk dei ideen om å lage og selje slike dessertpannekaker heime også.

Same sommaren var dei 12- og 13-åringane i gang med kafé heime i hagen til Almås sine foreldre.

Familie og vener av foreldra kom.

– Me fekk inn mellom 3000 og 4000 kroner. Då var me veldig nøgde, minnest Almås i dag, ti år seinare.

Christina (18) og dei andre ungdommane på bedehuset samla inn over to millionar til misjonen

Året etter, i 2015, dukka det plutseleg opp 100 mann i hagen til foreldra.

Ordet om crêpe-kafeen hadde spreidd seg.

Dei då 12 og 13 år gamle jentene fekk hendene fulle. Det gjorde dei andre gjestene også.

Mormor måtte hive seg i crêpe-steikinga, andre blei sende bort for å hente fleire hagemøblar eller til butikken for å kjøpe ingrediensar til crêpe-røre.

– Det var litt kaos i starten, men me har fått eit ganske godt system nå, seier Almås.

Legg ned mange timar

23-åringen, som til vanleg studerer barnevern i Oslo, set av to dagar kvar sommarferie, til å arrangere crêpe-kafeen.

Saman med sju til ti frivillige frå bibelgruppe og bedehus skaffar ho ingrediensar, lagar røre, meny, set ut hagemøblar og pyntar.

Før gjestene kjem set dei frivillige seg ned og ber for dagen.

Så opnar hagekafeen.

Gjestene får kvar sitt bord og ein servitør som ønskjer velkommen og deler ut meny.

Dei kan velja mellom seks ulike crêpes. Prisen kan dei og velje, sjølv om det står ein pris på menyen.

– Me har skrive «litt for dyrt eller billig? Betal det som passar», fortel Almås og legg til:

– Veldig mange betalar litt meir enn den prisen som står, men viss det er ein svær familie med mange ungar og lite pengar, går det fint om dei betalar litt mindre enn det som står.

Spleiselag

Foreldra til Lisa Almås har pleidd å sponse crêpe-ingrediensane, som kostar 6.800 kroner. Egg og mjølk har dei fått gratis av lokale bønder.

Bonden Ingar (67) samla inn nesten to millionar kroner til misjonssjukehus på ein kveld

Crêpe-inntektene går direkte til KPK-Ukraina.

Både Almås og mor hennar har vore engasjert i organisasjonen i ei årrekkje. Almås har besøkt KPK sitt arbeid i det slaviske landet tre gonger og treft fleire av dei lokale når dei har besøkt Noreg.

– Det er mange glade gjevarar og ukrainarane har sagt til meg at dei er veldig takksame, seier Almås.

– Veit de noko om kva pengane blir brukt til?

– KPK-Ukraina bruker pengane der dei trengst. Dei driv barneheim og ein gard som gir arbeid til arbeidslause og måltid kvar dag til 3000 fattige, driv naudhjelp blant flyktningar og er med å arrangere kristne barneleirar, seier Almås.

Ber for pengane

Når kafeen stengjer om kvelden, skal det ryddast og vaskast. Så set dei frivillige seg ned igjen og ber for pengane som har komme inn.

Å drive crêpe-kafé er ikkje for latsabbar, men dei frivillige har ei sterk indre drivkraft.

– Me har vore i Ukraina og sett den store nauda dei har der og overfloda vi har her, seier Almås og legg til:

– Me vil både at dei skal få det betre materielt sett, og at dei skal få å høyre om Jesus og erfare kristen nestekjærleik i praksis. Det er det me prøver å gi til våre søsken i Ukraina.

Rettelse

I den opprinnelige versjonen av artikkelen står det at KPK-Ukraina gir måltid til 300 fattige kvar dag. Det korrekte talet er 3000 fattige. Opplysninga blei retta 1.8. kl 20:52.