Måtte skrote planar om ny kyrkje: Foreslår livssynsnøytralt rom

I over 50 år har det blitt kjempa for ei ny kyrkje i indre Ålesund bydel.

Og i haust kunne det sjå ut til at det som for mange hadde vore ein draum, skulle bli ein realitet.

Ein budsjettsprekk sette likevel kjeppar i hjula for planane.

No kan ei ny kyrkje vere på plass innan 2026. Og det med livssynsnøytralt seremonirom.

Det var Sunnmørsposten som først melde om dette.

Ein lang veg

Allereie i 2012 blei det vedtatt at Hatlehol kyrkje skulle bli bygd, men dårleg økonomi i Ålesund kommune gjorde at ein skrinla planane.

Men for litt under eit år sidan vedtok kommunen igjen å reise det som skulle bli eit signalbygg for bydelen indre Ålesund.

Arkitektfirmaet var det danske selskapet Cornelis Vöge.

Kommunen innvilga prosjektet 155,5 millionar kroner over tre år. Men i mai kom kontrameldinga.

Budsjettsprekk på over 50 millionar

I ein ny rapport, meldte Sunnmørsposten, viste budsjettet seg å sprekke med mellom 53–67 millionar kroner.

Soknerådet vedtok difor å skrinlegge planane om signalbygget for å starte ein prosess med eit nytt prosjekt innafor den budsjettramma dei hadde fått.

Nanna Vöge i arkitektfirmaet bak den opphavlege planen, seier likevel til Dagen at dei foreslo å legge fram eit nytt og billigare prosjekt, men fekk avslag av hensyn til anbodsreglar.

– Det må ut på anbod igjen. Då er det mogleg for dei å sende inn sitt forslag, seier kyrkjeverja i Ålesund, Andrea Hunger, til Dagen.

Livssynsnøytralt rom

Hunger seier til Sunnmørsposten at i det nye prosjektet kan det vere aktuelt å bygge eit livssynsnøytralt seremonirom som ein del av kyrkja.

– Ålesund kommune har berre eitt slikt rom. Indre bydel er fortsatt i vekst og det vil difor vere ein fordel med eit kombinasjonsbygg som vil dekke behovet til heile lokalsamfunnet, seier ho når Dagen spør kva som ville ha vore formålet med eit slikt rom.

Ho forklarar samtidig at det er sett ned ei arbeidsgruppe for det nye prosjektet og at det er dei som til sjuande og sist avgjer kva kyrkja skal romme.

Trass i at finansieringa for kyrkja er vedtatt, er ikkje alle politikarane i byen for ei ny kyrkje.

Ordførarkandidaten til FrP i Ålesund, Håkon Lykkebø Strand, skriv til dømes på Facebook tysdags formiddag at kommunen ikkje har råd til å bygge Hatlehol kyrkje no.

– Er det nødvendig med eit slikt livssynsnøytralt rom som du foreslår, for å få med kommunen på planane om den nye kyrkja, Hunger?

– Kyrkja har fått godkjent 155 millionar kroner. Det er dette som blir tatt som utgangspunkt i den vidare planlegginga, seier Hunger.