MIFF-leiar fortviler over «sjikane» mot israelvener: – Ytringsfridommen har gått for langt
Politiet avviser at dei kan gripe inn.
Publisert
Steinkasting, skjellsord og meiningsmotstandarar som filmar dei.
Etter terroråtaket 7. oktober har Med Israel for Fred (MIFF) sitt største lokallag, som held til i Stavanger, fått gjennomgå av meiningsmotstandarar.
Annonse
Styremedlem i MIFF Stavanger, Bjarne Bjelland, har fått nok.
– Ytringsfridommen har gått for langt
I mai skreiv Dagen om steinkasting og ukvemsord mot israelvener på MIFF si markering på Israels nasjonaldag.
På årsdagen etter terroråtaket mot Israel 7. oktober møtte mellom 15 og 20 palestinaaktivistar opp tett opptil MIFF sine lokale. Der blei dei verande dei tre timane møtet varte, ifølgje Bjelland.
Det same skal ha skjedd på eit MIFF-arrangement 4. november.
«Støynivået var høyt.. Sjikane av møtedeltakerne ved ankomst og da de gikk fra møtet», skriv han på Facebook.
Dagen har sett bilde av demonstrantar som roper og filmar eller tok bilde med mobilkamera denne kvelden, men har ikkje videoopptak frå opptrinnet.
MIFF-deltakarar måtte passera palestinaakativstane som ropte «MIFF er terrorist» og «Netanyahu er terrorist» etter dei, ifølgje Bjelland.
Annonse
– Mange av deltakarane våre kjende eit sterkt ubehag. Dei lurer på om dei skal sjikanerast slik, berre fordi nokon kallar det ytringsfridom.
– Må ein ikkje tole nokre ukvemsord i ytringsfridommens namn?
– Me skal ikkje tolerera så truande og sjikanerande oppførsel som det denne gjengen utviste i går og 7. oktober. Då har ein flytta ytringsfridommens grenser for langt, seier Bjelland.
Politiet var på staden på arrangementa både 4. november og 7. oktober.
Ikkje politiet si oppgåve å gripe inn
Politiet si rolle er å vareta tryggleik, ro og orden, slik at både meiningsberarar og meiningsmotstandarar kan ytre seg trygt på offentlege stader.
Det skriv fungerande seksjonsleiar for førebyggjande og patrulje i Stavanger, Tom Erik Birkeland i ein e-post til Dagen.
Han skriv vidare at politiet ikkje skal stoppe markeringar eller ytringar, heller ikkje når bodskapen blir oppfatta som provoserande, krenkjande og sårande.
Annonse
– Det er ikkje politiet på staden som skal gjere rettslege vurderingar av om ytringar er straffbare, poengterer Birkeland.
Men i etterkant av ei markering vil ytringar som er er straffbare eller hatefulle kunne bli etterforska og straffeforfølgd.
Døme på straffbare ytringar er vald, trugsmål og skadeverk.
– Å kaste stein, øydeleggje politibilar eller forsere politisperringar er døme på straffbare handlingar, og ikkje lovlege ytringar.
Seksjonsleiaren oppmodar å melde frå til politiet, dersom nokon meiner at andre har ytra seg på ein straffbar måte.
– Då vil påtale vurdere om ytringane er over grensa for kva som er greitt, skriv han.
Ber politikarane om hjelp
Bjarne Bjelland i MIFF har skrive fleire brev til Sør-Vest politidistrikt der han klagar på tryggleiken på MIFF-arrangement.
Annonse
24. juni fekk han svar frå politimeisteren, som tok sjølvkritikk etter steinkasting mot MIFF-deltakarar i mai.
Men det blir ingen fleire brev frå Bjelland til politiet med det første.
– Det er grense for kor mange brev ein kan skrive, seier han og speler ballen over til dei folkevalde:
– Nå må heller ein oppegåande stortingsrepresentant ta dette med ytringsfridom og tryggleik opp med justisministeren i Stortingets spørjetime, seier Bjarne Bjelland.
