Milliontap for kristne konferansesenter

Pinsekyrkja Filadelfia Kristiansand si storstove, Q42, har fått mykje merksemd sidan den vart reist for 600 millionar kroner i 2016.

Rekneskapstala har vore raude sidan starten, og i februar vedtok styret å opne opp for alkoholservering i eit forsøk på å snu pilene.

– Sparar der vi kan

Styreleiar i Kristiansand kongressenter, Mona Mortensen, meiner at dei ikkje har det noko vanskelegare enn andre i koronakrisa.

– Nei, det går med oss som med alle andre. Vi søker om tiltakspakkane og prøver å spare der vi kan.

Pastor i Filadelfia Kristiansand, Wiggo Skagestad, sa til Dagen førre veke at forsamlinga har permittert «cirka 30 personar».

Mortensen seier at kongressenteret har delvis permittert «fem-seks personar», men at dei framleis bur seg på aktivitet til hausten.

– Er det fare for at de kan gå konkurs?

– Det avhenger av om staten bidreg med hjelp no når kundegrunnlaget har falt bort, seier Mortensen.

Titals millionar i tap

Oslofjord Convention Center (OCC) i Sandefjord er tilknytt Brunstad Christian Church, også kjend som Smiths vener på folkemunne.

I påska skulle 14.000 unge og vaksne ha påskeleir på OCC, men på grunn av koronaviruset vart leiren avlyst.

– På bakgrunn av situasjonen med koronaviruset og konsekvensane av myndigheitenes råd og anbefalingar, har Oslofjord nedskalert drifta midlertidig og permittert mange av de tilsette, skriv CEO Stian Fuglset i Oslofjord Convention Center i ein SMS til Dagen.

Kongressenteret har permittert «cirka 90 tilsette» ifølgje nettstaden deira.

– Reint økonomisk fører koronaviruset til tap på fleire titals millionar kroner for Oslofjord, skriv Fuglset.

Brunstad Conference Center stod ferdig i 2004, og skifta namn til Oslofjord Convention Center i 2011.

Førebels kontroll

Eit halvt år etter at Forum Scene i Bergen opna dørene er alle vårens arrangement avlyst eller utsett på grunn av koronaviruset.

– Vi reknar med at Salt Bergen og bibelskolen Substans framleis kan betale husleige, men arrangøren Forum Scene, som steller i stand alle konsertar og arrangement, har full stopp, seier styreleiar Jens Petter Glittenberg i eigedomsselskapet Fjøsangervegen 28, altså eig bygget.

Salt Bergen og skipsreiar Dan Odfjell kjøpte gamle Forum Kino for drygt hundre millionar kroner i 2018 frå TV Visjon Norge og Kristen Medieallianse (KMA).

Den gongen omtalte Glittenberg bygget som «Bergens Rockefeller» i Bergens Tidende. No står Forum tomt.

– Kor dramatisk er situasjonen for dykk no?

– Dersom dette løyser seg i løpet av dei nærmaste månedane, er det ingen dramatikk for oss. Men viss hausten ryk, har vi eit problem, seier Glittenberg.

Tapar 50.000 i uka

På Sotra utanfor Bergen ligg Straume Forum, som er eigd av indremisjonsforeninga ImF Straume. I kjellaren driv forsamlinga gjenbruksbutikk, og i toppetasjane har dei kontorlokale, som blant anna husar hovudkontoret til Indremisjonsforbundet.

Dei har merka at inntektene har forsvunne.

– Vi merkar dette godt. Bruktbutikken er stengd og klarer ikkje betale husleige. Alle arrangement er avlyst for heile vårsemesteret, og eit rekneskapsbyrå som leiger i bygget, har bede om husleigefritak, seier styreleiar Atle Våge i ImF Straume og oppsummerer:

– Vi snakkar om tap på 50.000 kroner i uka.

Bygget stod ferdig i 2016 og hadde ein prislapp på 70 millionar kroner.

Våge seier at det er begrensa kva dei kan gjere for å redusere utgiftene.

– Nesten alle tiltaka i krisepakkene til staten handlar om å ta vare på dei tilsette, men vi har ikkje tilsette. Medan andre sparar på arbeidsgjevaravgift og moms, er det usikkert om vi får noko som helst av desse krisepakkane, seier Våge.