Misnøgd nabo fekk kyrkjeklokker til å stilne. Då blei det bråk
Soknerådet tok omsyn til nabo som meinte han blei vekt for tidleg på søndagane.
Publisert
Sist oppdatert
Det skjer med jamne mellomrom: Ein nabo klagar så mykje og så lenge over å bli forstyrra av kyrkjeklokker at kyrkja til slutt trykker på lydlaus-knappen.
No har det skjedd igjen, denne gong i Danmark. Ballerup kyrkje på Sjælland avsluttar ein lang tradisjon — av omsyn til nabofreden.
Annonse
Men det er alt anna enn stille på lokalavisa sin Facebook-vegg.
– Ikkje noko problem
Ein av kyrkja sine naboar var lei av å bli vekt tidleg på fridagen. Han sende ein klage til soknerådet og fekk medhald. No skal ikkje klokkene lenger ringe i otta på heilagdagen.
– Vi er pragmatiske og hadde ikkje noko problem med å imøtekome naboen sitt ønske.
Det seier leiaren i soknerådet, Rikke Ærtebjerg, til Sjællandske Nyheder. Dei var første ute med å fortelje om saka.
«Kjøp øyreklokker»
Men tru ikkje at freden dermed har senka seg. For andre naboar er svært misnøgde med avgjerda. På avisa si Facebook-side får soknerådet og den misnøgde naboen hard medfart:
«Viss ein ikkje kan tåle at dei ringjer med klokkene, skal ein ikkje bu i nærleiken av ei kyrkje.»
Annonse
«Kjøp øyreklokker».
«Eg har hatt større problem med toget.»
«Det neste blir vel at vindmøllene skal stå stille når det bles.»
«Snart kjem det sikkert ein minaret. Kanskje han heller vil høyre på det.»
«Eg ville sett fuglane på lydlaus om morgonen.»
Dette er nokre døme i ein tirade som torsdag morgon talde omlag 150 kommentarar.
Vide rammer for lokal tilpassing
Ballerup kyrkje soknar til Helsingør stift, der biskop Peter Birch meiner soknerådet har sitt på det tørre når dei sluttar å ringe klokka sju om morgonen på søndagar.
Annonse
Biskopen minner om at klokkeringinga er ein gammal tradisjon som høyrer dansk kultur til. Ein ringjer sola opp og ned.
– Men akkurat tidspunkta og lengda er det vide rammer for å tilpasse lokalt, seier biskopen ifølgje Kristeligt Dagblad.
Kyrkjeklokker på pinseaftan
Eit søk i Dagens og andre arkiv viser at naboklager på kyrkjeklokkar er eit kjend fenomen. Så seint som i år kom det reaksjonar på at ei kyrkje i Gjesdal ringte med klokkene ein heil time på pinseaftan.
Det naboane ikkje hadde fått med seg, var at tradisjonen med høgtidsringing er eldgamal og velkjend i dei fleste bygder og bydelar.
