Nektar å leige ut til verdskjend evangelist

Åtte byar i Skottland, Wales og England skal etter planen få besøk av den amerikanske evangelisten i måndadsskiftet mai-juni. No står kampanjen i fare etter at sju av dei har annullert utleigekontrakten. Også den åttande, Utilita Arena i Newcastle, verkar usikker. Byrådsleiar Nick Forbes har lagt press på leiinga der.

– Eg trur ikkje det er nokon plass for han i byen vår, seier Forbes om Graham til Pride Radio, ifølgje Premier Christian News.

Strid om homofili

Det er LHBT-miljøet som har engasjert seg mot Graham-kampanjen med skuldingar om at han er «anti-homo» og fremjar hat. Det avviser Graham.

«Eg kjem for å dele evangeliet, som er dei gode nyheitene om at Gud elskar folket i Storbritannia og at Jesus kom til jorda for å redde oss frå syndene våre», skriv han på Facebook.

Han meiner spørsmålet det kokar ned til, er om homoseksuelle handlingar er synd.

«Svaret er ja», skriv han. Men han understrekar at bodskapen hans ikkje stoppar der.

«Bodskapen min til alle menneske er at dei kan bli tilgjevne og ha eit rett forhold til Gud».

Han inviterer spesielt alle i LHBTQ-miljøet til møta.

Sterkare motstand

Evangelisten har ikkje rokka ved planane om å kome til Storbritannia, men gått ut med oppmoding til støttespelarar om å be for turneen.

«Det må setjast inn mykje bøn og innsats, og hundrevis av kyrkjer rundt i Storbritannia står saman om denne turneen. Dette er åndeleg krig. Fienden ønskjer ikkje at evangeliet skal bli proklamert», skreiv Graham.

Den første kanselleringa kom i Liverpool der også den anglikanske biskopen Paul Bayes gjekk ut mot Graham.

I 2018 var Graham i Blackpool i England og samla fleire tusen menneske til møte. Men også då var det motstand. Somme representantar i Underhuset ville nekte han innreise.

Året før hadde Graham møte i Oslo spektrum. Den gongen oppstod det ikkje diskusjon om utleige, men fleire kristenleiarar og politikarar som først var mellom innbydarane, valde å trekkje seg. Grahams utsegner om islam og relasjonen hans til president Donald Trump var noko av det dei problematiserte.

Ser ny strategi

Engelske Harvey Thomas var jobba i 15 år som kampanjeleiar for Billy Graham Evangelistic Association. Deretter vart Thomas pressesekretær for den britiske statsministeren Margaret Thatcher på 1980-talet.

– Det vart ei fundamental endring i tilnærminga til organisasjonen etter at Billy Graham vart pensjonert, seier Thomas til Dagen.

Verdsevangelisten Billy Graham vart kjend for møtekampanjar på alle kontinent og for at han hadde relasjonar med alle amerikanske presidentar i etterkrigstida. Thomas påpeikar at Graham senior alltid kom som forkynnar etter invitasjon frå lokale kyrkjer.

– Franklin kan ikkje seie det same. Ingen har invitert han. Han kjem fordi han har bestemt seg for det, seier Thomas.

Han meiner dette også set lokale kyrkjer i ein vanskeleg situasjon.

– Dei fleste er forsiktige og stille og vil ikkje hindre Herrens arbeid eller gå til åtak på ein kristen bror, seier han.

Samstundes trur han det er vrient for kyrkjene å bli assosierte med Graham-kampanjen. Thomas påpeikar at Graham ikkje berre provoserer med skarpe utsegner om kontroversielle spørsmål som homofili og islam, men også med den politiske profilen sin.

– I Europa tilhøyrer kristne mange forskjellige politiske parti, men i USA er haldninga at dersom du er kristen, så røystar du republikansk, seier han.

Splittar kristne

Redaktør Sam Hailes i Premier Christianity meiner Grahams utsegner om islam og Trump har vore upopulære i Storbritannia, men at det er LHBT-spørsmål som har ført til utestenginga.

– LHBT-miljøet er sinte, såra og opprørte, seier Hailes i ein epost til Dagen.

Han meiner kristne deler seg i tre grupper i denne saka: Dei som aktivt støttar Graham, dei som er samde med han i sak, men ikkje i framgongsmåte, og dei som går imot han.

– Etter mitt syn fell dei fleste kristne, og i alle fall dei fleste evangelikale, i den første eller den andre kategorien, skriv Hailes. Men han påpeikar at det også innanfor fellesskapet i Evangelical Alliance er svært forskjellige haldningar til turneen.

Konsekvensar for fleire

Jurist Laurence Wilkinson i den kristne juristorganisasjonen ADF International meiner motstanden mot Graham inneber å innskrenke ytringsfridomen.

«Vi er på veg i ei dårleg retning når vi prøver å kneble menneske som har uttrykt ting vi er usamd med», skriv Wilkinson i ein lesarinnlegg på premierchristianity.com.

Bråket rundt Graham får ringverknader for andre. E in kyrkjelyd i Edinburgh har fått kansellert ein leigeavtale fordi ein annan amerikansk gjestepredikant har møtt motstand på grunn av utsegner om LHBT-spørsmål.

– Kristne som har eit tradisjonelt syn, må uttale seg på ein klarare måte. Dei må vere klare på at Gud ikkje hatar nokon og at kristne ikkje hatar nokon. Vi er kalt til kjærleik, seier Hailes.

Samstundes spør han seg om samfunnet vil gi rom for at kristne har eit anna syn på moralske spørsmål enn fleirtalet. Han reknar med at liknande saker kjem opp igjen.

– Eg ser ikkje føre meg at dette mønsteret endrar seg med det første, seier Hailes.