Nye reglar fører til stort pengetap for kristen radiokanal
Ny lov set kjeppar i hjula for basar og åresal. No kjem Radio Sunnmøre, driven av ImF Sunnmøre, med varsku.
Publisert
Sist oppdatert
Den nye pengespellova skapar problem for Radio Sunnmøre.
Den kristne lokalradioen seier dei truleg vil tape opp mot ein halv million kroner i året.
Annonse
Dei får nemleg ikkje lenger lov til å drive med basar og åresal, melder dei på nettsidene sine.
– Dette er svært kritisk
Kvart år har den kristne lokalradioen hatt eit lotteri med ei samla inntekt på opp mot 200.000 kroner. Og på hausten ei Radiomesse, der delar av inntekta har komme av åresal og basarbok.
Det er ikkje lenger lov. Det fekk dei beskjed om frå Lotteritilsynet i mars, meir enn eitt år etter den nye pengespellova trådte i kraft.
– Dette er svært kritisk for Radio Sunnmøre og gjer at vi må tenkje nytt, seier Ragnhild Kristine Vartdal Espelund, dagleg leiar for radioen.
Dei håpar no på fleire pengegåver, som framleis er lovleg.
Lokalradioen er driven av Sunnmøre Indremisjon. Kanalen tar sikte på å halde lyttarane oppdatert om aktuelle hendingar i nærmiljøet med utgangspunkt i kristne verdiar.
Dei skriv at dei «legg vekt på dei kristne grunnverdiane og det kristne livssynet».
