Omstridd tverrkyrkjeleg gigant feirar 75 år. I toppleiinga sit fleire norske nøkkelpersonar

Den største tverrkyrkjelege organisasjonen i verda, Kyrkjenes verdsråd, feirar 75 år.

Organet har over 580 millionar medlemar fordelt på 120 land.

I ei pressemelding frå Den norske kyrkja blir det verdsomspennande rådet hylla.

Likevel har det dei siste åra også vore omstridd.

75-årsjubileum

Rådet med medlemskyrkjer i over 120 land vart mellom 2010 og 2020 leia av nordmannen Olav Fykse Tveit, som i dag er preses i Den norske kyrkja, altså den fremste biskopen.

Også etter han gjekk av har fleire nordmenn fått sentrale posisjonar.

Ein av dei er Ingeborg Midttømme.

Ho er til vanleg biskop i Møre bispedømme, men sit også i Kyrkjenes verdsråd (KV) si «regjering», Sentralkomiteen, som representant for Den norske kyrkja (DNK).

Førre helg var ho i den sveitsiske byen Genève for å feira KV's 75-årsjubileum.

– Vi er midt i verdshistoria. Det er 75 år sidan KV blei etablert på bakgrunn av ein brutal krigføring som hadde tatt livet av uendeleg mange, seier ho i pressemeldinga frå Den norske kyrkja.

Kyrkjenes verdsråd vart nemleg oppretta i 1948 som ein respons på den andre verdskrigen.

Målet var å jobbe for fred mellom kyrkjer. Både når det kjem til teologiske usemjer, og med tanke på sosialetiske spørsmål.

Den russisk ortodokse kyrkja fortsatt inne

Det er noko av grunnen til at rådet i nyare tid har blitt kritisert for å ikkje kaste ut Den russisk ortodokse kyrkja, noko dei seinast førre veke bekrefta at dei ikkje ville gjere.

Leiaren av kyrkjesamfunnet, patriark Kirill, har nemleg blitt skulda for å legitimere Putins krig i Ukraina.

Midttømme er klar på at det er ein konflikt KV tar omsyn til, samtidig som ho gir uttrykk for at KV's arbeid gir håp.

– Vi er i Europa og følgjer nøye med på krigføringa i Ukraina og det som skjer i Russland.

– Samtidig tar vi inn over oss brutalitet, konfliktbilete og den ekstreme skeivheita i forbruk og velferd som pregar verda i dag. Midt i alt som skjer, gir dette fargerike fellesskapet der bønn ber oss gjennom dagen, håp om ei meir rettferdig framtid, seier ho.

Kjetil Fretheim, professor i etikk og diakoni ved MF vitenskapelig høyskole er den andre representanten for Den norske kyrkja i «regjeringa» til KV.

Han også understrekar at forsoning er noko som tar tid.

– Det er krig og konflikt nokon stader, rasisme og diskriminering andre stader. Det er få eller ingen enkle løysingar og veldig mange synspunkt. KV er ein arena for samhald og samarbeid, men vi er på ingen måte einige om alt, seier han.