Ordførar vil ta opp steinkasting mot MIFF med politileiinga
– Tryggleiken verkar ikkje å ha vore godt nok teken hand om, seier Stavanger-ordførar Sissel Knutsen Hegdal om MIFF-markeringa 14. mai.
Publisert
Sist oppdatert
14. mai markerte 300 israelvener Israel sin nasjonaldag i Byparken i Stavanger.
Med Israel for Fred Stavanger (MIFF) var arrangør.
Annonse
Også 100 pro-palestinske motdemonstrantar møtte opp, utan å ha varsla politiet eller å ha søkt kommunen om arealløyve.
Situasjonen kom ut av kontroll.
To politibetjentar, 400 demonstrantar
Politiinspektør Kathrine Sæland Rotseth sa på førehand til Aftenbladet at politiet hadde sett inn ekstra mannskap i høve markeringa.
Likevel var det ingen politimannskap på staden då markeringa skulle starte klokka 18:00.
MIFF prøvde å kontakta politiet utan hell og ringde til slutt nødnummeret. Etter ein halvtime kom først to politifolk til byparken, litt seinare to politibetjentar til.
Hatkrim, steinkasting og politimeldingar
I ettertid har MIFF Stavanger og to pro-israelske demonstrantar blitt melde til politiet for hatkriminalitet.
Annonse
Pro-palestinske motdemonstrantar kasta steinar mot MIFF-tilhengarar. Også dette resulterte i ei politimelding frå israelven Reidun Kristoffersen (71).
Nestformann i MIFF Stavanger, Bjarne Bjelland, kalla tryggleikshandteringa for ein politiskandale.
21. mai sende MIFF Stavanger klage til politimeister Hans Vik i Sør-Vest politidistrikt.
No, ein snau månad etter Israel-markeringa gjekk av stabelen, kjem også Stavanger-ordføraren på banen.
Bystyrerepresentant: – Skremmande
Blant dei som såg steinane før ho skulle halde appell på MIFF-scenen 14. mai var bystyrerepresentant, Kristin Lode (Frp).
Ho stilte spørsmål ved politiet si handtering av tryggleiken denne kvelden, på formannskapsmøte 30. mai.
– Det er svært skremmande at det blir kasta stein i Stavanger mot ei lovleg markering i eit land med ytringsfridom, og endå meir skremmande at det ikkje blei stoppa eller fekk nokon form for konsekvensar, sa ho i sitt innlegg.
Annonse
Vidare stilte ho ordføraren følgjande spørsmål:
– Synest ordføraren at ei slik tryggleikshandtering er tilstrekkeleg? Dersom nei, kva vil ordføreren gjera for å sikra at slike situasjonar ikkje skjer igjen?
Ordføraren: – Alvorleg
Ordførar Sissel Knutsen Hegdal innrømte i sitt svar at tryggleiken ikkje verka å ha vore godt nok vareteke, basert på det som har komme fram i media.
– Dette er sjølvsagt alvorleg og noko eg som ordførar vil ta opp med leiinga i Sør-Vest politidistrikt, sa ho til formannskapet.
Vidare sa ordføraren at ho vil hente inn informasjon frå Sør-Vest politidistrikt, slik at ho kan få vite meir om kva som låg bak avgjersla for oppdragsløysinga som politiet valde.
Kommunen og politiet har jamlege møter, kalla politiråd.
I rådsmøta diskuterer dei felles utfordringar, som til dømes tryggleik på demonstrasjonar. Ordførar har ennå ikkje avtalt tidspunkt for neste politiråd.
