Päivi Räsänen: Veldig takksam for all støtte og forbøn
Dagane i retten er over og dato sett for dom i saka mot den kristne finske politikaren.
Publisert
Sist oppdatert
I mars i fjor vart Räsänen frikjend for skuldingar om tre tilfelle av hatprat mot homofile, men aktoratet anka saka.
Det galdt ei Twitter-melding frå juni 2019, eit hefte med tittelen «Til mann og kvinne skapte han dei» frå 2004 og eit radiointervju.
Annonse
– Eg er veldig takksam til alle rundt i verda som har sendt meg meldingar om at dei støttar meg og ber for meg, sa Räsänen på ein digital pressekonferanse fredag ettermiddag.
– Burde forstått fornærming
Fredag var den andre og siste dagen av ankesaka i Helsinki.
Aktor Anu Mantila hevda at dersom Räsänen elskar og aksepterer homofile, ville ho gjort noko anna enn det ho har gjort.
– Ho ville gi dei same rettane til dei som til andre menneske. Ho ville akspetere deira likekjønna seksuelle åtferd, sa ho ifølgje cne.news.
Mantila meiner både Räsänen og biskop Juhana Pohjola, som er tiltalt saman med henne for å ha publisert det nemnde heftet, må ha forstått at utsegnende deira er fornærmande.
– Dei må ha forstått at ytringane deira truleg vil forårsaka forakt, diskriminering og hat mot homoseksuelle, sa ho.
Skuffa over skuldingar
Annonse
Under pressekonferansen understreka Räsänen at ho ikkje kjenner seg igjen i denne framstillinga. I retten har ho gjentekne gonger framheva at ho ikkje ser homofile som mindre verdige eller at dei ikkje er skapte av Gud.
– Det har skuffa meg og såra meg, seier ho om desse skuldingane.
Ho er også lei seg for at dette inntrykket er blitt spreidd internasjonalt.
– Ein treng ikkje vere samd med meg for å meine at i eit demokratisk samfunn, skal alle få ytre seg fritt, sa ho.
– Prega av si tid
Räsänen erkjenner at pamfletten er eit produkt av si tid, men meiner han ikkje av den grunn burde verte sensurert eller ulovleg. I sak står ho framleis for dei same standpunkta.
Aktor har spurt kvifor ho ikkje har oppdatert pamfletten.
– Eg seier at eg ville vere glad for å skrive oppdatert materiale om dette, fortalte Räsänen.
Annonse
Dagen spurde under pressekonferansen om aktor har ført nye argument samanlikna med saka i tingretten.
– Det kom ikke noe substansielt nytt, svara Coleman.
Dommaren kunngjorde at dei ikkje greier å halde den ordinære fristen på 30 dagar for å kome med ei avgjerd. Men det skal seinast skje innan 30. november.
