Pakistanar som var arrestert etter skulding om blasfemi, vart drepen av politimann

Politimannen er arrestert for det dødelege åtaket. Det melde pakistansk politi på torsdag, ifølgje Reuters.

Åtaket skjedde i Quetta, som ligg i provinsen Balochistan, sørvest i landet.

Strenge tryggingstiltak

Den tiltalte er ikkje namngitt. Han skal ha oppsøkt ein mann som var i arrest på ein politistasjon etter skuldingar om blasfemi. Politimannen gav seg ut for å vere ein slektning før han opna eld mot den tiltalte.

Den drepne vart arrestert tidlegare i veka. Han var halden i ein politistasjon med strenge tryggingstiltak. Ein stor mobb hadde samla seg og kravde å få overgitt mannen.

– Det inngår i eit tragisk mønster. Mobbens herjingar fører til død for folk som, heilt uavhengig av om det finst prov eller ikkje, blir truga på livet, seier redaktør Johannes Morken i msijons- og menneskerettsorganisasjonen Stefanusalliansen til Dagen.

Det er ikkje kjent kva religion mannen hadde. Namnet Abdul er meir typisk for muslimar enn kristne, men det er heller ikkje nytt at også muslimar i Pakistan vert råka av skuldingar om blasfemi.

I sommar jaga ein mobb bort politiet og sette fyr på ein 36-åring, ifølgje Al-Jazeera. Mobben skulda han for å ha vanhelga Koranen. Mannen overlevde ikkje.

Skulda for vanhelging

Dagen har seinast i sommar skrive om trakassering og åtak som råkar kristne i Pakistan, ikkje minst som følgje av blasfemiskuldingar.

I juni døydde den kristne pakistanaren Lazar Masih, knapt ei veke etter at han vart angripen av ein ekstremistisk mobb som skulda han for blasfemi. Seinare same månaden vart ein annan mann lynsja etter skuldingar om å ha vanhelga Koranen.

Rett på vern

Den britiske trusfridomsorganisasjonen Christian Solidarity Worldwide uttrykkjer djupe kondolansar med familien til Abdul Ali, som no er drepen av ein politimann.

President Mervyn Thomas spør kven som skal sikre tryggleiken til slike ofre når politiet sjølv er involvert i slike valdshandlingar.

– At blasfemi framleis er kriminalisert er heilt i strid med Pakistans nasjonale og internasjonale forpliktingar om trus- og religionsfridom, og ein farleg pådrivar for religiøs ekstremisme i landet, seier han i ei pressemelding.

Ber EU leggje press

Åtaket skjedde medan EUs spesialutsending for trus- og religionsfridom er på oppdrag i Pakistan. Thomas meiner EU nå må ta opp situasjonen med pakistanske styresmakter, for at dei skal treffe tiltak mot misbruk av blasfemilover.

– Ekstremistane har eit livsfarleg nakketak på deler av samfunnet og rettstryggleiken, seier Johannes Morken.

Han legg til at opp mot 100 menneske er drepne av mobb etter skuldingar om blasfemi. Sjølv om ein i rettssystemet kan bli dømd til døden, er det ingen som er blitt avretta for blasfemi i denne perioden.

Morken meiner den norske regjeringa må krevje at pakistanske styresmakter tek tak i desse problema på ein annan måte.

– Det er ikkje berre farleg for dei det gjeld, men også for Pakistan, meiner han.