Pastor oppmodar kristne til å bu seg på borgarkrig

Grunnleggjaren av MorningStar Ministries var gjest i Jim Bakker Show nyleg.

– Det kjem til å bli ein borgarkrig, og han kjem til å bli verre dess lenger tid det tek for amerikanarar å stå opp og kjempe tilbake mot dette vonde som har teke over landet vårt, sa Joyner.

Han viste til Forkynnaren i Det gamle testamentet som skriv at det er ei tid for fred og ei tid for krig.

– Vel, vi er ikkje på veg mot fred akkurat no. Vi er på veg mot konflikt og krig. Og vi treng å førebu oss på det, sa Joyner. ( Heile intervjuet kan du sjå her.)

Valjuks

Intervjuet starta med påstandar om valjuks. Slike påstandar fremja både Trump og støttespelarane med stor styrke etter at Joe Biden vart erklært som vinnar i november, men dei kom aldri med prov som overtydde domstolane.

Joyner er mellom dei kristne støttespelarane til Trump som ikkje firer ein tomme.

– Det var den største røysteskandalen i historia vår, sa Joyner.

Han hevda at Donald Trump eigentleg vann presidentvalet overlegent.

– Kanskje var det den største marginen nokon gong, men valet vart stole frå oss, sa han.

Pastoren hevda at valjukset var så ille at det ikkje kunne funne stad i Mexico eller i latinamerikanske land som folk i USA elles reknar som bananrepublikkar.

Kristne med våpen

Det som ifølgje Joyner skal utløyse borgarkrigen, er massiv innvandring til USA frå sør. Han fortel om ein draum der han har sett ein horde som var så forferdeleg at han til og med skremte terrororganisasjonar som al-Qaida.

– Vi må vere klare til å forsvare familiane våre, lokalsamfunna våre, naboane våre, kyrkjene våre, for alt kjem hit sa Joyner.

Han meiner skiljelinja vil kome når styresmaktene byrjar å krevje inn våpen, noko han sterkt åtvarar mot å godta.

Fryktar vald

Paul Glader, som er redaktør for nettavisa religionunplugged.com og underviser i journalistikk ved kristne King's College i New York, synest utspelet til Joyner er trist.

– Eg trur slik retorikk kan føre til vald, seier Glader til Dagen i ein epost.

Han viser til storminga av Kongressen i Washington D. C. i januar der somme av deltakarane brukte kristne symbol.

– Kor representativ trur du han er?

– Eg trur ikkje han er representativ for kristendommen som heilskap i Amerika. Men eg trur han er representativ for ei undergruppe av ein ny kulturkrig-kristendom som verkar til å ha rotfeste i republikansk politikk og i nokre karismatiske og pentekostale miljø, seier Glader.

Han konstaterer at mange kristne leiarar som støtta Trump, framleis trur at Biden stal valsigeren.

– Kanskje trur også somme av dei at Trump vil kome tilbake på mirakuløst vis. Eg trudde verkeleg at fleire av dei ville orsake offentleg for avgudsdyrkinga si og for den forførande spreiinga av feilinformasjon etter at presidentskapet hans svann inn i historia. Eg har ikkje sett mykje av dette så langt, seier redaktøren.

Mellom kristne fotfolk trur han nokre har «vakna opp» for kva kristen Trump-støtte har ført til, men han trur det vil ta mange år å forstå rekkevidda av dette.

Mindre dominans

Magasinet Newsweek og New York Times-spaltist Nicholas Kristof er mellom dei som har følgt opp utspelet til Joyner.

Kristof gler seg over at landet no har fått ein president og fleire toppolitikarar som snakkar om trua si på ein måte som ikkje er knytt til republikansk politikk.

– Dei fleste kyrkjegjengarar er framleis konservative, og kvite evangelikale røysta overveldande på Trump. Men når det offentlege inntrykket av tru vert mindre dominerte av figurar på høgrefløyen, kan det bli lettare for landet å lækje såra sine, skriv Kristof.

Var glanseksempelet på ein moderne sørstatsbaptist. Så kom Donald TrumpBeth Moore

Pastor kjempar for våpenrettar