Paven: Antisemittisme er synd mot Gud

Åtaka mot jødar verda rundt var utgangspunkt for eit brev til den jødiske befolkninga i Israel som er datert 2. februar og vart gjort offentleg på laurdag, melder Premier Christian News.

«Saman med dykk er vi, katolikkar, svært urolege for den forferdelege auken i talet på åtak mot jødar verda rundt. Vi hadde håpa at «aldri igjen» ville vere eit refreng som vert høyrt av nye generasjonar», skriv paven.

I brevet held han fram at kyrkja «avvisar alle former for antijudeaisme og antisemittisme og utvitydig fordømer manifestasjon av hat mot jødar og jødedom som synd mot Gud».

Fortvila jøde

Oppsving i antisemittisme ser ein også i Italia. Det har fått Holocaust-overlevande Liliana Segre (93) til å spørje om innsatsen hennar har vore forgjeves.

I fleire tiår har Segre besøkt italienske klasserom for å fortelje si eiga historie om korleis ho vart kasta ut av skulen på grunn av Benito Mussolinis antisemittiske raselover - til faren og besteforeldra vart drepne. Det same gjorde tusenvis av andre italienske jødar.

– Kvifor leid eg i 30 år for å dele intime ting frå familien min, av smerta mi, av desperasjonen min? For kven? For kva? spør Segre i eit intervju med New York Times.

Ber om fred

Paven har fordømt Hamas-åtaket mot Israel 7. oktober i fjor. Han har også teke til orde for at gisla som vart tekne, må bli sette fri.

Han forsikra det jødiske miljøet om at han vil vere nær dei og har medkjensle, særleg dei som er «oppslukte av angst, smerte, frykt og til og med sinne». Og han understreka at han ber for både israelarar og palestinarar.

Manchester United-trener Erik ten Hag: – Vi må be