Prest fekk lokalavisa felt for publisering av dette biletet

Måndag fortalde Dagen om prest Toralf Veum Ladstein som klaga lokalavisa si til Pressens faglege utval.

Då redaktøren i lokalavisa drog fram mobilen frå lomma, bad presten om å ikkje få bilete av seg i avisa. Biletet vart likevel trykt.

No får Veum Ladstein medhald i Pressens faglege utval.

– Eg synest media skal ha respekt for kjelders ønske om å ikkje bli avbilda, sa Øyvind Kvalnes som representerer folk flest i utvalet.

Tok bilete av han på kaia

Hendinga skal ha skjedd torsdag 9. november i fjor. Han fekk ein flygesetel i handa frå pendlarforeininga – ein augneblink redaktøren foreviga.

Presten uttalte seg i saka, men ønska ikkje bilete av seg i avisa. Han ville ikkje bli assosiert med noka politisk sak ettersom han er sokneprest i Suldal.

Sigbjørn Høidalen er ansvarleg redaktør i Øyposten. Han erkjenner i tilsvarsrunden at presten «ikkje var veldig ivrig etter å ha bilde av seg i avisa».

Samtidig opplevde redaktøren inga kategorisk avvising.

Brot på god presseskikk

Veum Ladstein klaga inn lokalavisa for brot på to punkt i Ver Varsam-plakaten, norske journalistar sitt presseetiske kartverk.

Han meinte dei hadde brote reglane i punkt 4.12 om biletebruk. Og i punkt 3.3 om klare premissar i kontakt med kjelda.

Sekretariatet til PFU innstilte på å frifinne Øyposten. Det var utvalet derimot ueinige i.

Blei felt for bruk av bilete

I møtet som vart «streama» på Journalisten.no vart det aktuelle biletet vist fram.

Redaktøren i lokalavisa grunngjev i tilsvarrunden publiseringa av biletet med at det er vanleg at dei må forhandle om å få bruke bilete.

Ellen Ophaug som sit i rådet som representant for journalistane, påpeiker at det likevel ikkje ser ut til at redaktøren innleia noka form for forhandling med presten.

– Han har uttalt seg under føresetnad om at det ikkje skal vere noka bilete, sa utvalets leiar, Anne Weider Aasen frå TV2.

– Saka hadde vore helt annleis om Øyposten skreiv ei sak om måten han utøver si prestegjerning på, sa Gunnar Kagge frå Aftenposten.

Han meiner det i ei slik samanheng bør vere helt ok å bruke bilete av presten. Dette er likevel ein annan samanheng der presten ikkje vil bli dratt inn i ei lokal konfliktsak.

Dømd for punkt 3.3

Enkelte i utvalet gav uttrykk for at dei helte mot sekretariatets innstilling på frifinning.

Eit fleirtal blei derimot einige om å felle Øyposten for brot på god presseskikk utifrå punkt 3.3. i Ver varsam-plakaten.

– Da blir konklusjonen i denne saka at Øyposten har brote god presseskikk på punkt 3.3 i Ver varsam-plakaten, sa leiaren av utvalet, Anne Weider Aasen, avslutningsvis.

Der seier plakaten at «det er god presseskikk å klargjere premissane i kontakten med kjelder.»

Det er ikkje avgjort endå om enkelte av medlemmene tar ut dissens.