Prest langar ut mot indremisjonen i lokalavis: «Til helvete med helvete»

Danmark opplever for tida noko så uvanleg som ein helvetesdebatt i ei lokalavis.

I Aarhus Vest har prestane i området ei fast spalte som går på omgang. I denne spalta tek sokneprest Lars Lindgrav Sörensen eit kraftig oppgjer med Indre Mission og det han opplever som rørsla si forkynning av helvete.

– Eit vanvittig maktmisbruk, skriv presten om predikantar som brukar «frykta for helvete til å slå folk i hovudet så dei får dårleg samvit.»

– Det skapar angst at ein blir sett utanfor fellesskapet, meiner presten i Tilst og Kasted på Jylland.

Artikkelen har fått overskrifta «Til helvete med helvete», og i kortfatta vendingar sparar ikkje presten på krutet:

– Så til helvete med helvete vi skapar for kvarandre og til helvete med det helvete som måtte vente ved slutten av livet, spissformulerer han.

– Såkalla bibeltru

Presten meiner frykta for helvete har vore eit effektivt våpen til å skremme born.

– Den største angsten vi har er å bli satt utanfor fellesskapet, og denne heilt grunnleggjande skrekken brukar menneske i såkalla bibeltru, fundamentalistiske krinsar i mellom andre Indre Mission, skreiv han i spalta 30. juli.

Dermed var debatten i gang. I same lokalavisa skriv Kurt Christensen, indremisjonsleiar i Aarhus Nord, at presten slår seg sjølv på munnen når han skuldar indremisjonen for å gje folk dårleg samvit.

Nestekjærleik og samvit

Han viser til at den kristne kyrkja i store deler av si forkynning kan komme i skade for å gje folk dårleg samvit, mellom anna i bodet om å elske sin neste.

– Den forma for forkynning er ingen indremisjonsk spesialitet, påpeikar Christensen.

Han er til dagleg professor i teologi ved norske Fjellhaugs avdeling i Danmark.

Christensen vedgår at forkynninga i indremisjonen «her og der kan ha hatt ei slagside, som hos særlege personlegdomstypar har fremja dei kjenslene» som presten skildrar.

– Det er ikkje forkynninga som åleine gjer oss til usikre, skrøpelege og feilande menneske. Det er vi i utgangspunktet, meiner han.

– Sunt at det blir diskutert

Teologiprofessor Bo Kristian Holm seier det er sjeldan at kvasse teologiske debattar går føre seg i lokalavisene no for tida. Dei er meir vanlege i sosiale medium.

Professoren ved Aarhus universitet meiner debatten viser at religion ikkje berre er ei privatsak.

– Religion og trua på himmel og helvete betyr noko for den måten vi agerer på i kvardagen. Derfor er det også sunt nok at det blir diskutert, også i ei lokalavis. Men det krev ei finkjensle i høve til dei ein skriv til og det forum ein skriv i, seier Holm til Kristeligt Dagblad.

– Unyansert

Han stiller også spørsmål ved om ei kortfatta spalte i ei lokalavis er rette forum for så store spørsmål.

– Det ser ein også ved at det er eit litt unyansert, folkeleg bilete av Indre Mission som soknepresten teiknar, meiner professoren.