Prestestudent føler seg i dag usikker på framtida i Den norske kyrkja

Debattinnlegget kom etter biskopen i Oslo, Kari Veiteberg, nyleg uttalte til Vårt Land at ho «ikkje kan tilsetje menneske som ikkje vil vie alle».

Seinare kalla ho utsegna «høgtenking» om kva retning kyrkja bør ta.

Dagen har møtt fire av studentane, som no er usikre på om Den norske kyrkja ønsker dei velkomne som prestar.

NLA-studenter: Har vi en framtid i Den norske kirke?

Dobbeltkommunikasjon frå kyrkja si leiing

Det er roleg i kantina på NLA Høgskolen fredag morgon. Forutan kantinepersonalet, er det berre dei fire teologistudentane Dagen har avtale med som er i kafeteriaen.

Det er eit grått mursteinsbygg i ytre Sandviken, rett utanfor Bergen sentrum, som huser den kristne høgskolen. Institusjonen er kjent for sine konservative haldningar til samlivet, noko som speglar av i fleire av studentane.

Skulen har for berre eit års tid sidan fått løyve til å utdanna prestar, og nyleg kunne Dagen melde om eit rekordstort kull med prestespirer. Det er godt nytt for Den norske kyrkja, som er avhengige av rekruttering for å ta bukt med ei årelang prestekrise.

Teologistudentane som sit i den nyoppussa kantina, er likevel bekymra.

Fleire av dei understrekar at dei lenge har vore det, men at Oslo-bispens uttalelesar sette bekymringa deira på spissen.

– Eg er usikker på om Den norske kyrkja i det heile tatt vil ha meg. Det er ingen god posisjon å vere i, seier Reidar Røyset Almedal.

Han har han vore inne på tanken om å ta profesjonsstudiet for å bli prest, men har no landa på å berre ta ein master i teologi.

– Det handlar i stor grad om at eg er bekymra for om det vil vere rom for konservative prestar i Den norske kyrkja i framtida, seier teologistudenten på siste året av bachelorgraden sin.

Ingen med bakgrunn frå Den norske kyrkja

Det er varierande kva bakgrunn dei 18 underskrivarane har. Ingen av dei fire Dagen møter har sin andelege heim i folkekyrkja. Og dei speglar i stor grad av dei 18, fortel dei.

Nokre av dei har likevel vore innom Den norske kyrkja, som dåpsbarn, konfirmantar eller sommarvikarar.

Det er også varierande kor seriøse planar eller tankar dei 18 studentane har hatt om å bli prest.

Éin ting har dei likevel til felles.

– Vi ønsker å gå inn i ei teneste. Kva kyrkja heiter, er ikkje så viktig for min del, seier Bjørnar Sæle.

Han skriv no masteroppgåva si og har sikta seg inn på profesjonsstudiet, som ein må ta for å bli prest i Den norske kyrkja. I fjor sommar skreiv Dagen om korleis han landa i eit ønske om å tenestegjere der.

Slik fann sommarvikarane Bjørnar (24) og Erlend (23) ut at dei ville bli prestar

No er planen hans likevel å i første omgang gå inn i ein frikyrkjeleg samanheng, sjølv om prestekallet ikkje er lagt heilt vekk.

Vil stille biskopane til ansvar

Josefine Garnes Mjøs går på profesjonsstudiet i teologi. Ho skreiv under på debattinnlegget fordi ho ville stille biskopane til ansvar etter uttalelesen til Veiteberg. Ho ville ha greie på om det er slik at alle prestar er velkomne i Den norske kyrkja.

– Når du er student, tenkjer ein jo fram og tilbake på kva ein skal bruke utdanninga si på, og då er det eit viktig spørsmål om arbeidsgjevaren din har lyst på deg, seier ho.

Også ho kunne tenkt seg å bli prest, men opplever at situasjonen for dei med eit klassisk syn på samlivet i Den norske kyrkja, er veldig usikker.

Har ein brann for evangeliet

Johannes Skoge er på slutten av sin bachelor i teologi. Han også har vore inne på tanken om å bli prest. No har han landa på å gå vidare til ein master i teologi utan å ta praktikum, slik prestar må gjere.

– Det er til dels på bakgrunn av desse bekymringane vi løfter fram, seier han og legger til:

– Det er nok kallet til å forkynne evangeliet som er viktig for oss. Eg er ikkje avhengig av Den norske kyrkja, men det er synd for ei kyrkje i ei prestekrise å gå glipp av prestar som dei treng, seier han.

Biskop: – Det er ein plass for dei

I debattinnlegget retta dei 18 teologistudentane seg ikkje berre mot Kari Veiteberg, men også mot biskopen i Bjørgvin, Ragnhild Jepsen. Ho har nemleg kontor ein 20-minuttar spasertur unna høgskolen.

Tidlegare denne veka besøkte ho studentane på NLA Høgskolen. Der takka ho dei for engasjementet deira og svarte på nokre av spørsmåla dei hadde.

– Eg sa klart til dei at det er ein plass for dei i Den norske kyrkja, med det synet på ekteskapet dei har. Kyrkja har vedteke å ha to syn i denne saka og eg ville trygge dei på det, seier ho og legg til:

– Hadde eg tenkt annleis om saka, ville det ikkje vore aktuelt å la meg nominere til bispevalet.

Jepsen vart utnemnt som biskop tidlegare i år.

– Din kollega, Kari Veiteberg si utsegn om at ho «tenkjer at ho ikkje kan tilsetje menneske som ikkje vil vie alle» var noko av bakgrunnen for at dei løfter fram bekymringa si. Kor viktig er det kva ein biskop seier, Jepsen?

– Det er klart at når ein biskop uttalar seg offentleg, gjer vi det med eit læreansvar. Sitatet frå Veiteberg er ikkje sagt i ein offentleg samanheng. Utover det vil ikkje eg kommentere det ein annan biskop har sagt.

Ser ikkje kvifor dei er bekymra

No svarar Oslo-biskopen, Kari Veiteberg, sjølv på kritikken frå dei 18 studentane.

– Kan du forstå at dei er bekymra?

– Det får eg ta til etterretning. Kyrkjemøtet har i vedtaket lagt til grunn at det er ulike syn i kyrkja, men berre ein praksis når det gjeld inngåelse av likekjønna ekteskap.

Ho understrekar også at det ikkje er ho, men bispedømmerådet ho er ein del av, som tilsett prestar.

– Vil eit konservativt syn på samlivet vere til hinder når du skal ordinere nokon til prest?

– Vi treng dyktige folk og vi har eit stort mangfald av studentar. Kandidatars samlivssyn har ikkje vore eit eige tema i mine samtalar med dei.

– Kva tenkjer du om at 18 teologistudentar seier dei er usikre på framtida si i kyrkja etter ei rekke utsegn frå deg?

– Det eg ønsker er at folk verkeleg skal ville lese og studere Bibelen på teologistudiet. Lære seg gresk. Lære seg hebraisk og skrifttolking. Så må vi halde fram med å snakke om dei vanskelege tekstane: Kva er ekteskap i Bibelen og korleis tolkar vi desse tekstane i dag?

– Kva vil du seie til dei?

– Eg vil takke for engasjementet deira og seie at dei er velkomme inn i ei kyrkje med eit stort mangfald. Vi må alle passe på at vi ikkje trakkar på andre. Eg håpar at Guds rike og i framtida breier om seg, og at studentane blir godt fagleg utrusta til tenesta med ord og sakramentsforvalting, ved NLA.