Reaksjonar på Hadia Tajiks angrep på kristen skule: – Ho splittar lokalsamfunnet
Ap-nestleiar Hadia Tajiks omtale av kristne friskular i si nye bok har fått fleire i heimkommunen hennar til å sjå raudt.
Hadia Tajik (Ap) si ferske bok «Frihet» har hittil fått mest merksemd for bokomslaget, men no reagerer fleire i heimkommunen hennar på omtalen av dei kristne friskulane som Norsk Luthersk Misjonssamband og Normisjon driftar i Strand kommune.
Motstandar av friskular
Annonse
Ap-nestleiaren skriv i boka at ho er motstandar av alle private skular med eit religiøst grunnlag. I Bjørheimsbygd meiner ho den kristne skulen delar lokalsamfunnet, særleg fordi den ligg berre eit steinkast frå den offentlege skulen.
«Det er vanskeligere å forstå akkurat dette: en kristen skole på et sted med mye synlig kristendom. Et lokalsamfunn så lite at skolene blir liggende inntil hverandre, som symboler på parallellsamfunn», skriv ho.
– Tajik splittar kommunen
Ordføraren i Strand kommune, Irene Heng Lauvsnes (H), reagerer kraftig på Tajiks utsegn om at privatskulane skaper parallellsamfunn i kommunen.
– Eg meiner Tajik er med på å splitte kommunen med eit slikt utsegn. Vi skal ha respekt for at nokon vel noko anna enn den offentlege skulen, seier Lauvsnes.
Høgre-ordføraren meiner Arbeiderpartiet bør slutte å sette offentlige og private skular opp mot kvarandre og heller jobbe for eit betre samarbeid mellom dei.
Ho meiner likevel at det er ei grense for kor mange elevar friskulane bør ha i ei kommune og at det taket no er nådd i Strand.
– Eg ønskjer at friskulane skal vere eit supplement til den offentlege skulen. Vi er ei kommune på 13.000 innbyggjarar, og kan ikkje la privatskulane bli så store at det ikkje er elevar igjen i den offentlig skulen, seier Lauvsnes.
Annonse
Les Tajik sitt svar lenger nede i saka.
– Treige og nostalgiske
Rektor ved Tryggheim Strand, Brynhild Samuelsen, er intervjua av Tajik i boka. Ho seier at ho opplevde møtet som positivt, men kjenner seg ikkje att i bilete ho teiknar av skulen og intensjonane som ligg bak.
– Ho omtalar oss med respekt, men ho forstår ikkje kvifor det er behov for ein kristen skule. Ho framstiller oss som treige og at samfunnsutviklinga har gått for fort for oss, men vi ønskjer å formidle ei levande tru som betyr noko for oss i dag, seier Samuelsen som presiserer at sitata hennar i boka er riktige, men at ho reagerer på Tajiks kommentarar.
– Tajik meiner de er drivne av nostalgi. Bommar ho?
– Ja, absolutt. Ho har sjølv gått i ein kristen barnehage og på bedehuset, så det er kanskje hennar eigen nostalgi som pregar korleis ho tolkar oss. Ho har så absolutt ikkje forstått kvifor vi er her, seier rektoren.
– Vi splittar ikkje
I den offentlege skulen i Strand kommune er det totalt 1800 elevar. Dei to kristne friskulane, Tryggheim Strand og KF-skolen Jørpeland, har 200 elevplassar kvar. Tryggheim Strand har i dag i underkant av 80 elevar.
Annonse
Rektoren meiner ikkje at den kristne skulen splittar lokal- samfunnet.
– Vi får ungdommar frå fleire kommunar og ulike miljø. Av dei 80 elevane vi har, er det ikkje mange frå skulen rett borti her. Vi har ein stor variasjon og mangfald. Det er eit alternativ for dei som ønskjer det og treng noko anna, seier Samuelsen.
Avviser kritikken
Hadia Tajik skriv i ein e-post til Dagen at Høgre har stått for eit frislepp i privatskular, og at Lauvsnes sin reaksjon viser at ho løftar ein nødvendig debatt.
– Det er diverre sant at vi risikerer å utvikle parallellsamfunn, og at det blir mindre pengar igjen i kommunekassa til elevane på den offentlege skulen. Eg lurer på om Lauvsnes ville vore meir redd for parallellsamfunn dersom det var ein muslimsk privatskule som blei oppretta på Tau eller Jørpeland, skriv Tajik.
Ho ønskjer å starte ein større debatt rundt religiøse friskular.
– Det kan sjølvsagt føre til nokre ubehagelege samtalar, men eg trur likevel at ein av dei viktigaste debattane i vår tid handlar om kva private, religiøse skular gjer med eit lite lokalsamfunn, skriv Ap-nestleiaren.
Tajik skriv også at ho lenge har jobba for ein lokal vetorett, slik at kommunar sjølv kan styre omfanget av religiøse skular i sitt lokalsamfunn. Dette blei foreslått i Arbeidarpartiets programutkast for komande stortingsperiode.
