Samla rundt ein død baby
Når islamistane feirar at ein baby er drepen, seier det meir enn vi vil vite om kva haldning dei har til fredeleg og respektfylt sameksistens.
«Hamas kunngjer med stor stoltheit dødsfallet til sin martyr Salih Omar Barghouti, som gjennomførte den heroiske Ofra-operasjonen».
Det skreiv den palestinske terrororganisasjonen på Twitter i går om mannen som vart skoten og drepen av israelske styrkar. Det er illustrert med ein smilande ung mann med skjegg. Bakgrunnen er til å bli kvalm av.
Annonse
Heltemotet innebar nemleg å skyte mot menneske som stod på eit busstopp utanfor den israelske busetjinga Ofra søndag kveld. Dette var den åttande kvelden i den jødiske lysfesten hanukkah, då lysa skin som sterkast. Kontrasten til mørkret som råka tilfeldige sivile menneske som berre skulle reise med buss, vart desto sterkare.
Sju menneske vart såra. Blant desse var ei kvinne som var komen 30 veker ut i svangerskapet. Ektemannen kasta seg fram for å verne henne. Barnet vart forløyst, men døydde onsdag ettermiddag. Han rakk berre så vidt å sjå dei såra foreldra sine.
«Du bringa så mykje lys. Og med alt lyset du har bringa, vil vi slokke mørkret deira», sa den gråtkvalte bestefaren Refael Ish-Ran ved grava til den døde babyen til gravplassen på Oljeberget i Jerusalem.
Foreldra Shira and Amichai Ish-Ran var framleis på sjukehus med skotskadar. Rett før gravferda vart babyen symbolsk omskoren og fekk namnet Amiad Yisrael. Namnet Amiad betyr «folket mitt er evig». Det seier noko om den sterke symbolkrafta som ligg i nettopp dette dødsfallet.
«Nasjonen Israel vil forbli», slår juristen og skribenten Jessica Levine Kupferberg fast på bloggen som ho skriv for Times of Israel.
Hatet og brutaliteten Israel står overfor frå Hamas og andre som vil landet til livs, er det vanskeleg å fatte. Når islamistane feirar at ein baby er drepen, seier det meir enn vi vil vite om kva haldning dei har til fredeleg og respektfylt sameksistens.
Sist veke fremja USAs avtroppande FN-ambassadør eit resolusjonsforslag for generalforsamling med fordøming av Hamas. Resulusjonsforslaget gikk i rette med mellom anna rakettåtaka mot Israel frå Gaza, oppmodingar til vald og at organisasjonen prioriterer dette framfor å dekkje dei kritiske behova til eiga befolkning.
Forslaget retta seg også mot organisasjonar som Islamsk Jihad. 88 land røysta for og 57 imot resolusjonsforslaget. Dermed fekk det simpelt fleirtal, men dessverre hadde Kuwait på førehand fått gjennom eit forslag som kravde to tredels fleirtal for at resolusjonen skulle verte vedteken.
Annonse
Det ville vere bra om FN for første gong kunne fordømt brutale og omsynslause Hamas. Vi er altfor vane med at det verdsorganisasjonen greier å samle seg om i Midtausten-konflikten, er fordømingar mot Israel.
Den militante islamismen utgjer eit eksistensielt trugsmål mot den jødiske staten som knapt kan overvurderast. Så lenge dei ønskjer å utslette Israel, er det umogeleg for forsvarlege israelske politikarar å inngå kompromiss.
I går vart to jødiske busetjarar drepne og ytterlegare to såra i eit nytt skyteåtak. Hamas har enno ikkje teke ansvaret for dette åtaket, men ein talsmann hyllar også dette som heroisk.
Denne organisasjonen vert visst aldri mett av mørkre. Men hat og fiendskap er veikare enn lys og kjærleik. Slik sett var det eit sterkare håp som kom til syne mellom sørgjande menneske ved ei barnegrav i Jerusalem denne veka.
