Ser utfrose skulelag som eksempel for Kristen-Noreg

Dei siste vekene har det vore mykje mediemerksemd rundt det kristne skulelaget ved Sagatun ungdomsskule i Sogndal. Elevane vart nekta rom frå skuleleiinga og kommunedirektøren og valde derfor å samle seg utandørs.

Denne veka reflekterer generalsekretær Karl-Johan Kjøde i Norges Kristelege Student- og Skuleungdomslag over saka i Dagen-podkasten Tore og Tarjei.

– At ein vert nekta rom er ikkje så veldig overraskande, seier Kjøde.

Han fortel at dette er noko organisasjonen opplever jamleg.

– Ekstremt lite farleg

Forskjellen denne gongen var at kommuneleiinga stod så fast på avslaget og gjorde det også skriftleg.

– Det var eg overraska over, seier Kjøde.

Denne tilnærminga meiner han også forklarer at den offentlege merksemda rundt sak vart såpass stor.

– Det er gøy at ungdommane sjølve har vorte ansikt for det dei held på med, seier han.

Eit bilete som dokumenterer dette, der skulelaget sit ute på kunstgrasbanen med matpakkar under paraplyar, er blitt brukt i fleire media.

– Det er talande for kva eit skulelag er og kor ekstremt lite farleg det er, seier Kjøde.

Skolelags-nekt ble gjort uten politisk behandling – nå skal politikerne se på saken

– Urimelege påstandar

Problematiseringa av kristenlagsverksemd ser han i lys av ein meir utbreidd skepsis til forkynning, særleg på offentleg stad.

– Det kjem store og luftige skuldingar i desse grunngjevingangane om at det føregår forkynning på skulen, og at dette fører til splitting, krenking og diskriminering, seier Kjøde.

Når ein ser ungdommane i Balestrand, synest han slike påstandar framstår urimelege.

Forbod mot forkynning

I fjor haust kom dåverande kunnskapsminister Guri Melby (V) med ei presisering av forbodet mot forkynning i skulen, uttrykt i opplæringslova.

– Mitt hovudfokus med ny lov har vore å sikre grunnleggjande rettar for elevane. Og retten til å ikkje bli utsett for forkynning på skulen er kjempeviktig, sa Melby då ho gjesta styret til Human-Etisk Forbund.

Kjøde meiner det er eit problem at omgrepet forkynning i media og offentleg debatt vert brukt på ein tåkeleggjande måte.

– Berre nokon seier forkynning, så skjer det nærast noko magisk. Ein går frå normal samtale til at ein eller annan kjem for å indoktrinere med eitt eller anna maktovergrep, seier han.

Byggjer ned fordommar

Opplevinga av å vere mistenkjeleggjord på ukjenneleg vis trur Kjøde at det kristne skulelaget deler med mange i Kristen-Noreg. Ved å ta utfordringa sakleg og med godt humør meiner han også at dei har teke brodden av kritikken.

I podkasten peikar Kjøde på «religiøse skrekkhistorier» i media som ei forklaring på at skulelagsverksemd og forkynning vert møtt med skepsis.

– Det dårlege inntrykket er så overveldande, og all religion representerer akkurat det same, samanfattar han.

Den beste motgifta trur han er å møte vanlege kristne som lever ope med trua si.

– Då kan trua vere truverdig og attraktiv, meiner generalsekretæren.

Kommunedirektøren mener Sagatun-saken fremstilles feil: – Ingen har blitt nektet å be

Behov for føredøme

I kontakt med ungdommar høyrer han ofte spørsmål om korleis trua skal sjå ut i praksis. I ein meir sekularisert kultur erfarer han at dei ofte står i meir utfordrande valsituasjonar enn truande gjorde for berre 20–30 år sidan.

– Det byr også på nokre moglegheiter fordi det er noko attraktivt med dei som skil seg ut, meiner Kjøde.

Situasjonen gjer at han også ser behov for at fleire vaksne og eldre kristne er førebilete for unge og er villige til å bruke tid med dei.

Heile intervjuet med Kjøde kan du høyre i Spotify, iTunes og andre tenester som leverer podkast, samt på dagen.no: