Siglar i kjølvatnet til St. Sunniva: – Ho var modig og sterk

Dei fire ungdomspilegrimane følgjer Sunniva-skrinet frå klosterøya Selja i Nordfjord til Bergen. Reisa starta sist fredag og skal vare til komande laurdag.

På vegen synest dei har opplevd mykje spennande.

– Det mest spesielle var kanskje velkomsten vi fekk på Askvoll, med prest, ordførar, konfirmantar og kor. Til saman var det mange som kom for å ta bilete og hjelpe til med å bere Sunniva-skrinet, fortel Victoria Lid frå Os. Ho er ortodoks kristen.

Spennande møte

Elisabet Osdal frå Selje er lutheranar. Det same er Dina Øien frå Florø.

– Det mest spennande er alle dei nye folka vi møter, seier Elisabeth.

Sunniva Aadland Høen, som er katolikk, framhevar at det har vore lærerikt å få samtale om likskapar og skilnader mellom dei kristne tradisjonane jentene tilhøyrer.

– Eg har lagt merke til at dei ortodokse har faste morgonbøner, som vi ikkje er så vane med, seier Dina.

Det er utforma eit felles bønehefte som dei brukar saman på turen.

– Vi har vore med på fleire protestantiske gudstenester, og eg merkar at det er ein god del skilnader. Men felles er det jo at vi trur på den treeinige Gud, seier Victoria.

Gamle skuter

Den 7. september er det 850 år sidan levningane av den irsk-fødde helgenen St. Sunniva blei overført frå Selja til Bergen. Dette blir markert med ein Sunnivafestival 4. - 8. september med alt frå sporløp til konsertar, føredrag og seminar.

Legenda om Sunniva har sett tydelege spor etter seg, og Sunnivafestivalen er difor ein del av Bergen by sitt 950 års-jubileum, opplyser Bjørgvin bispedøme i ei pressemelding.

Gründarar for opplegget er Ragna Sofie Grung Moe i Bjørgvin bispedømmeråd og Kjell Magnus Økland i kystkultur.no.

– Ekstremt koseleg

– Korleis har det vore å bli kjende med kvarandre?

– Det har vore ekstremt koseleg. Vi lever så tett på kvarandre at vi er blitt godt kjende sjølv om vi ikkje har vore i lag så lenge, seier Sunniva.

Sjølv om dei snakkar mykje om trusspørsmål, vert det også litt anna.

– Vi snakkar jo om gutar og andre ting som tenåringsjenter er opptekne av, vedgår Victoria Lid med ein liten latter.

Følg ferda på instagram:

Hotellfrukost

– Kvifor synest de Sunniva er interessant?

– Ho var veldig modig og sterk. Ho heldt seg til Gud og til løfta og verdiane sine. Og ho er jo blitt den einaste kvinnelege helgenen frå Noreg, seier Sunniva Aadland Høen.

Planen er at dei skal sigle inn på hamna i Bergen laurdag ettermiddag.

– Eg gler meg til å sjå alle menneske som skal vere der, seier Dina.

Dei skal overnatte på hotell i byen.

– Eg gler meg til hotellfrukosten, seier Dina med eit smil.

Opnar pilegrimssenter

For Sunniva Aadland Høen blir det eit gjensyn med kjende trakter.

– Eg kjem eigentleg frå Bergen, men bur i Oslo. Eg gler meg til å kome til kyrkjelyden der eg vaks opp, seier ho.

Etter at dei er komne i land, blir det det opning av Bergen regionale pilegrimssenter på Kristkyrkjetomta ved ordførar Marte Mjøs Persen.

Slik er du pilegrim på Vestlandet

Kulturministeren besøkte pilegrimsmål