Slik har du aldri sett Tryggheim: Oppgraderer for over 100 millionar kroner

Viss alt går etter planen blir Tryggheim vidaregåande skule sjåande heilt annleis ut innan år 2030.

Internatskulen i Sør-Rogaland får nytt internat, nytt undervisningsbygg og oppgradert uteområde. Delar av dei eksisterande lokala skal også byggjast om.

Elevkapasiteten blir den same som i dag.

Prislappen er på godt over 100 millionar kroner. Førebels.

Sjå bilda av den nye skulen lenger nede i saka.

– Me drøymer

– Er dette ei historisk satsing, rektor Gjermund Viste?

– Ja. Me drøymer, veit du.

Oppgraderingsprosjektet har fått namnet «Tryggheim 2030».

– Kor kjem pengane frå?

– Dei kjem frå banken. Me må låna, seier rektoren og legg til:

– Men me gleder oss over tilsegn om gunstige private lån frå Tryggheimvenner.

Hadde økonomiske bekymringar

Tryggheim 2030 blei presentert i Jærbladet og Stavanger Aftenblad berre to månader etter at økonomisjef Eivind Svensen fortalde Dagen at det hadde vore «ein skikkeleg kamp» å få budsjettet for 2024 å gå i balanse.

Blant elevane var det frykt for nedlegging.

Tiril sin friskule er rekordpopulær. Likevel fryktar elevane nedlegging

Grunnen var kostbare omleggingar som følgje av pandemien, prisstigning og redusert statsstøtte.

Fleire friskular er også urolege for kva som vil skje dersom regjeringa flyttar makt frå nasjonale til kommunale politikarar, men det er ikkje Tryggheim-rektoren.

Regjeringens friskolekutt høster kraftig kritikk: – Prematurt, mener kommune

– Tryggheim har ein kommune og fylkeskommune som heier på oss. Me har god støtte hos politikarane med at me er med på å gjere ein viktig forskjell for mange ungdommar i Hå, Rogaland og resten av landet, seier Viste.

– Kvifor oppgradera for 100 millionar i ei tid som denne?

Milliontap ved ni av ti kristne friskular i Rogaland

– Me vel å satse og vere framoverlent. Oppgraderinga er nødvendig for framleis å drive denne gode skulen, seier Viste.

Mykje nytt, lite gjenbruk

Bygget som skal jamnast med jorda er internat- og klasseromsbygget Austheim frå 1958. Skulen har blitt tilråda å erstatta dette med eit nytt bygg, mellom anna fordi det er for tett mellom etasjane til å oppgradera med ny ventilasjon.

– Kan materialar eller interiør frå Austheim brukast om att?

– Gjenbruk er jo i vinden, så me vil vidareføre det som kan brukast om att, men mykje blir nytt. Energiforbruket vil dessutan gå monaleg ned i det nye bygget. Det sparer me store summar på.

Rektoren håpar at elevane kan flytte inn i det nye internatbygget allereie hausten 2025. Bygget skal romma 36 dublettar, deriblant fire rom tilrettelagt for rullestolbrukarar.

Nytt undervisningsbygg, på om lag 2600 m² og kapasitet til 190 elevar, skal vere på plass om lag tre til fem år fram i tid.

Vidare får det nye uteområdet amfi, sitjegrupper, sykkelparkering og basketballbane.

På toppen av det heile skal ei rekkje rom byggjast om i eksisterande bygg.

Håpar ikkje skulepengane aukar

Om oppgraderinga vil føre til auka skulepengar står att å sjå.

– Me håpar at eit høgt elevtal og gjevarkonseptet Heimkjær vil gjera at me kan halde skulepengane på dagens nivå, seier Viste.

Lillian (18) vil hjelpe russ å forebygge utenforskap: – Sett ord på uenighetene før det er for sent

Heimkjær er Tryggheim sin nye innsamlingsaksjon.

– Me har allereie fått ein god del faste givarar, som kvart år vil bidra med monalege summar. Dei vil vere med å finansiere bygging og renteutgifter for å betale ned lån på bygga.

Det vankar russeknutar til russ som blir fastgjevarar til Tryggheim for minst ti kroner i månaden. Frivillige gåver også er lagt inn i årsbudsjettet.

– Det er det historiske grunnar for å gjere. Me har alltid hatt ein stor del av gåver årleg. Me har til og med fått i sum millionar i testamentariske gåver opp gjennom åra, seier rektoren.

Satsar på private gåver

– Mange organisasjonar melder om sviktande gåveinntekter dei siste par tiåra. Kva er Tryggheim si erfaring?

– Me tenkjer motsett, seier Viste.

Han trur det er mange tryggheimvener der ute som ønskjer å vere med å bidra til «ein endå betre skule», men som aldri har fått spørsmål om å vere med.

– Det er litt av bakgrunnen for givarkonseptet Heimkjær. Dei som ønskjer å gi får nå høve til det.

Torbjørn (18) bad om vekking på skulen sin i to år: – Eg var i ferd med å gi opp

– NLMs region Sørvest starta i fjor kronerulling for friskulane sine. Kva seier grasrota til å ta nok eit stort økonomisk løft?

– Det er mykje positivitet rundt Tryggheim 2030. Dei heier på oss og mange har auka gjevartenesta svært monaleg. Det gler me oss over.