Slutta i jobben som 53-åring for å bli prest

Det endra seg då ho fekk vite at MF vitskaplege høgskule skulle starte opp ei toårig erfaringsbasert presteutdanning.

– Eg kjende ei vissheit innanfrå på at det var vegen å gå.

Bondevik slutta i jobben på Høgskulen på Vestlandet og starta på studiet som ho var godt kvalifisert til.

Frå før av har ho master i cellebiologi, utdanning i kunstterapi og årstudium i pedagogikk og kristendom.

To år etter er ho ferdig utdanna prest som 56-åring. På søndag vart ho vigsla til prest i Sogndal og Fjærland der ho vaks opp.

Porten og Sogn avis har nyleg skrive om Bondevik.

– Fekk eit bilde

Den nyvigsla presten, som har vore kristen heile livet seier det er fleire ting som har leda ho til å bli prest.

Ho har budd mange år i Nord-Noreg. Utdanninga ho tok der som kunst-terapeut var med på å forme ho.

I kunstmiljøet var det ein del meditasjon.

– Ein gong då eg mediterte fekk eg eit bilde av at eg stod framme i koret i Stedje kyrkje.

Då skjønte ho ikkje bildet. I ettertid har ho opplevd det som ei bekrefting på å flytte tilbake til Sogndal og å bli prest.

Bondevik forklarar at meditasjonen ikkje skjedde i ei kristen setting. Det var ope for å påkalla noko som var godt for ein, for ho var og er det Jesus.

– Det at eg opplevde Gud som nær der, seier noko om at Gud er over alt.

Særleg gjennom studiet opplevde ho Jesus tydelegare og at ho kom nærare han.

Stillekveld

– Å vera stille i kyrkjerommet gir meg noko. Det har symbolikk og Gud er der, så det er eit godt rom å vere i.

Då ho flytta tilbake til Sogndal starta ho noko som heiter «Stille kveld» i kyrkja. Det består av ein liten refleksjon frå ho, tidebøn, salmar og ti minutt stillheit.

Ho fortel at det i den stille stunda kan vere godt å kvile augene på altertavla, glasmåleri eller berre sitje i stillheit.

– Du kan bli møtt av Gud der du er og slik du er.

På ei av samlingane blei Bondevik anbefalt å lysa Velsigninga.

– Eg kjende det var utruleg fint å få lysa Velsigninga. Eg blir heilt på gråten når eg fortel om det.

Seinare fekk ho spørsmål om å vere medliturg

– Eg vart kjempegira og sa ja med ein gong.

Før prestestudiet, arbeida ho i administrasjonen på Høgskulen på Vestlandet. Der var ho ikkje redd for å snakka om eiga tru med andre. Ho kjente det var trygt, og at Gud var med ho.

– Eg hadde ikkje tenkt tanken på å bli prest, men fekk stadig fleire spørsmål om å bli det. Seks år med utdanning i min alder er uaktuelt.

Då det vart mogleg å ta studiet over to år, søkte ho.

Prestevigslinga

De to siste åra med studier har ho budd i Oslo i periodar.

– Mann, barn, familie og alle har vore veldig støttande, fortel ho.

Det var mange til stades då Bondevik på søndag vart vigsla til prest i Stedje kyrkje.

Blant dei var biskop Ragnhild Jepsen, ordføraren, og rektor på Høgskulen.

Prost Kjell Olav Høstaker Nordheim leia prestevigslinga og fleire bidrog musikalsk og med lesing.

– Det var verkeleg ei fin oppleving.

Bondevik har arbeidd i Sogndal og kjenner mange. Ho seier det var flott at det kom fleire som ikkje plar å gå i kyrkja.

– Eg brenn for at dørstokken i kyrkja skal vera låg og det skal vera lett å komma. For det er fleire enn dei som oppsøkjer kyrkja som har ein lengsel etter å kjenna Gud i denne usikre tida.

Møte med kjærleik

Den nyvigsla presten er opptatt av å bruke eit språk som vanlege folk forstår i gudstenesta.

– Det er viktig for meg å formidle Guds nåde og kjærleik. Behovet for å vera nær Gud veks når menneske blir møtt med opne armar, omsorg og kjærleik. Slik kan ein kjenne behovet for syndstilgjeving, noko som skal komme innanfrå.

56-åringen seier ho har levd så lenge at ho har erfaringar med å vende seg til Gud når ho har utfordringar.

– Det er ein styrke i møte med andre. Eg trur eg har ei forståing for kva det vil sei å vere eit menneske.

Bondevik gleder seg over å starte den nye arbeidskvardagen. Den neste månaden står blant mykje anna, fem vigsler for tur.

Kan bli erstattet av kvinnelig prest

Flere vil bli prest. Ett lærested er særlig populært: – Vi ser lyst på fremtiden