Søster Anne Bente Hadland: – Paven hadde alltid eit mål om å leie folk til Jesus

I dag blir pave Benedikt XVI, med fødenamn Joseph Ratzinger, gravlagt i Vatikanet.

Han gjekk bort 31. desember 2022, 95 år gammal, og har både i si levetid og i etterkant blitt hylla av fleire som ein stor teolog.

Men kva var eigentleg Ratzingers teologiske bidrag?

Teologisk karriere

Ratzinger hadde ein lang, teologisk karriere.

Tyskaren starta på studiet i 1946 og vart ordinert til prest fem år seinare.

Etter det fortsette han å studere i Roma, leverte doktorgraden sin og vart professor i teologi ved ei rekke tyske universitet.

Som teolog utmerka han seg.

Under Andre Vatikankonsil, den største fornyinga av Den katolske kyrkja i moderne tid, deltok han som teologisk rådgivar for erkebiskopen av Köln, Joseph Frings.

På syttitalet var han med å grunnlegge det teologiske tidsskriftet Communio saman med fleire andre framgangsrike teologar. Publikasjonen blei med tida ein svært viktig premissleverandør for katolsk tenking.

I 1977 forlét han universitetet då han vart utnemnd som erkebiskop av München og Freising av pave Paul VI, og seinare same året til kardinal.

Men han slutta ikkje å skrive av den grunn.

I 1981 vart han kalla til Roma av Pave Johannes Paul II.

Der hadde han ei rekke sentrale posisjonar fram til kardinalkollegiet i 2005 utnemnde han til pave, 78 år gammal.

Innan den tid hadde han publisert rundt 60 bøker.

Djupt truande akademikar

Søster Anne Bente Hadland ved Katarinahjemmet i Oslo har omsett fleire av bøkene Ratzinger skreiv til norsk.

– Han hadde alltid eit mål om å leie folk til Jesus, og forsvarte alltid den kristne trua, seier ho.

Søstera meiner trebindsverket Jesus frå Nasaret står i ei særstilling blant det han har produsert. Ho kallar desse bøkene ein syntese av Ratzingers teologi og sak

– Med eit bredt overblikk, audmjuke og skarpe analysar av vår tid går Ratzinger der i rette med sekulariseringa både i og utanfor kyrkja. Han insisterer på at sjølv om kyrkja mistar posisjon, er det viktigaste av alt å vere tru mot Jesus, seier ho og legg til:

– Det er den grunnleggande bodskapen i alt han skreiv.

Nonna forklarar kvifor ho meiner Ratzinger er ein unik teolog.

– Han er ein sjeldan kombinasjon av ein sylskarp akademikar og djupt truande kristen. Med eit stort intellektet gjorde han mysteriet i trua tilgjengeleg for alle, men sjølv hadde han grunnleggande sett ei enkel tru på Jesus, seier ho.

Økumenisk viktig

Den avdøde paven blir også hylla utanfor katolske kretsar.

Den nyleg avgåtte biskopen i Bjørgvin, Halvor Nordhaug, kallar Ratzinger «ein teologisk kapasitet av dimensjonar».

Han skriv i ein mail til Dagen at han er særleg glad i bøkene om Jesus frå Nasaret, som han også meiner var «eit viktig bidrag til økumenisk teologi».

«Her viser han god kjennskap til den aktuelle forskinga på bibelmaterialet, samtidig som han formidlar eit enkelt og tydeleg bilde av den Jesus som alle kristne trur på», skriv Nordhaug.

Biskopen fekk også ei kort møte med Benedikt XVI på Petersplassen i Roma for fleire år sidan.

«Han gjorde et varmt og vennleg inntrykk, og vi var begge einige om å halde ut i bønna for kristen einskap», skriv han.

I 2006 skreiv Benedikt XVI sitt åndelege testament, der ber han mellom anna kyrkja om å halde fast ved trua dei har fått overlevert. Testamentet blei først publisert etter han gjekk bort, og kan leses her.