Sparer kristen festival for ein halv million kroner

– Det er kjekt å vere med, og det er viktig å vere med. Ungdommane skal drive misjonsarbeidet vidare, seier Jørgen Ydstebø frå Stavanger som sjølv var deltakar på festivalen i ungdommen.

På dagtid arbeider han som prosjektleiar i byggebransjen. Etter arbeidsdagen er over stiller han som vaktleiar på den kristne ungdomsfestivalen UL i Stavanger.

– Dei unge må oppleve at vi er villige til å spandere tid på dei, seier Ydstebø.

Frivillige er avgjerande

Det vrimlar av ungdommar på festivalområdet i Vikinghallen på dagtid. Deltakarane besøker ulike utstillarar, kjøper mat i kafeen og sit ved langbord.

Ved tre ulike festivalbygg står vakter ved inngangane.

Som vaktleiar har Ydstebø overordna ansvar for skiftet, og inspiserer dei ulike bygga.

Frå klokka 15.30 til 02.00 er han frivillig medarbeidar to gongar under årets arrangement.

– Eg ønsker å vere ein av dei veldig mange som bidrar slik at UL kan realiserast, seier han.

Bak informasjonsdisken sit vaktkoordinator Kristoffer Flatebø med vaktplanane som inneheld 125 ulike namn.

I fjor undersøkte han kor mykje det ville koste å leige inn eit vaktselskap til å løyse oppgåvene som han og medarbeidarane hans gjer på UL. Prisen er 510.000 kroner.

– Utan dei frivillige hadde det ikkje vore noko UL, fastslår Flatebø.

Har vore med gjennom 20 år

Liv Marit Egeland Pettersen frå Spydeberg i Østfold set av ei veke kvar sommar for å delta på UL. Ho er ein del av eit team som tilbyr forbønn og samtalar.

– Det gir meg mykje å vere med. Eg får påfyll sjølv, seier Pettersen.

– Noko som har endra seg gjennom dei 20 åra eg har vore med som frivillig, er at dei unge i dag uttrykker at dei ønsker at vaksne skal vere til stades. Dei er takknemlege for at godt vaksne er her, seier ho.

Pettersen er imponert over deltakarane ho møter på festivalen.

– Eg var sjølv deltakar på UL. Før var det gjerne slik at ein sat seg på den bakarste benken for å verke kul. I dag er det eit større Jesus-fokus. Deltakarane kjem for å få påfyll, god forkynning og opplæring. Seminara er smekkfulle, fortel ho.

476 på dugnad

Tre tilsette har samla sett ein stillingsprosent på 125 i UL-systemet.

UL-koordinator Arne Jakob Tveita frå Klepp på Jæren er ein av dei tre med ei mindre stilling som arbeider med festivalen gjennom heile året.

Mellom ulike telefonsamtalar med medarbeidarar som ringer, opplyser han at 476 er med som frivillige under årets arrangement.

Dei aller fleste av dei er også med som deltakarar, mens cirka 80 er utanfor deltakargruppa og kjem innom som medarbeidarar i løpet av arrangementet.

– Fleire er nye, men vi har også mange som er med år etter år. Ein av fordelane med å arrangere UL i Stavanger er nettopp tilgangen til mange frivillige, seier Tveita.

Kjøkkenet er ei av avdelingane som samlar mange frivillige på festivalen. Bak disken med pizza står Berit Nag frå Tau og sel mat til jærbuen Fanuel Yrgaw.

Ho er med som frivillig på UL for første gong.

– Eg vil bidra her for å støtte eit viktig ungdomsarbeid, seier Nag.

Bruker sommaren på frivillig arbeid

På eit solfylt uteområde ved inngangen til festivalen går mekanikaren Halvard Skartveit frå Randaberg og elektrikaren Alf Magne Stokka frå Hommersåk i Sandnes med eit måleinstrument i handa.

Dei undersøker kva som kan vere årsaka til eit straumbrot.

Dei to er med frivillig og var blant fleire som begynte å klargjere festivalområdet allereie fem dagar før deltakarane kom.

– Eg har sett av to ferieveker til UL, seier Stokka.

Teknisk leiar Halvard Skartveit synest det er meiningsfullt å bruke sommaren til å stelle i stand festival.

– Det er mykje gildare å rigge kjøkken på UL enn å ligge på ei strand, seier Skartveit.

Frivillig bak kamera

Fire timar før kveldsmøtet begynner øver lovsongsteamet på scenen i Siddishallen utan tilhøyrarar i salen.

Bak videokameraa står frivillige fotografar som trenar på bevegelsar.

Arnt Thyve frå Bergen har vore med på UL-dugnad dei siste 14 åra. Då han fekk sommarferie som organist etter gudstenesta på sundag, sette han kursen mot Stavanger.

– Det er veldig mange kjekke folk som er med i teknisk crew. Fleire har vore med like lenge som eg har, mens andre har blitt med dei siste åra, seier han.

Då Thyve studerte TV-journalistikk på Gimlekollen, drøymde han om å bli kameramann.

Han får ikkje betalt for det, men løyser kameramann-oppgåver gjennom å filme møter, seminar og konsertar ei veke på UL kvart år.

– Det er først og fremst dei trivelege folka som gjer at eg ønsker å bidra, seier han.