Steinkasting på israelvener hamnar på politimeisterens bord

– Me er svært skuffa over at Stavanger har eit politi, som seier dei skal vere til stades og vareta tryggleiken på markeringa og ikkje følgjer opp lovnadane sine, seier nestleiar Bjarne Bjelland i Med Israel for fred (MIFF) Stavanger.

MIFF-demonstrantar blei møtt med steinkasting av palestinavener den 14. mai.

På motsett side har Sandra Pedersen Algassi meldt til politiet MIFF og to gjerningspersonar for hatkriminalitet.

21. mai sende MIFF Stavanger klage til politimeister Hans Vik i Sør-Vest politidistrikt.

– Manglande tryggleik

I klagen stiller MIFF Stavanger spørsmål ved:

– Kvifor det ikkje var sperringar som sikra trygg avstand til motdemonstrantane.

– Kva som skjer med dei mindreårige som deltok i dei palestinavenlege motdemonstrasjonane.

– Kvifor politiet ikkje stilte med større mannskap den aktuelle kvelden.

Også palestina-aktivistar reagerer

Bjelland, som sjølv har bakgrunn som politimann, er kritisk til politiet si handtering.

– Det er ei heilt umogleg oppgåve, for to mann, å hamle opp med over hundre demonstrantar, påpeiker han.

Stavanger-politiet hadde på førehand uttalt til Stavanger Aftenblad at dei hadde klar ekstra mannskap og ville vere synleg til stades under arrangementet.

I etterkant har også Palestina-aktivistar, som var til stades 14. mai, etterlyst betre vakthald, mellom anna i eit lesarinnlegg i Stavanger Aftenblad.

Sør-Vest politidistrikt tok imot klaga frå MIFF Stavanger 21. mai. Dei kommenterer ikkje innhaldet i klagesaker offentleg før saka er handsama og avsendar har fått svar.

Derfor blir det ikkje politimelding

Bjelland ventar at klaga vil føre til at politimeisteren gir ei forklaring på kva som svikta og at Stavanger-politiet set inn fleire tryggingstiltak på neste markering.

– MIFF Stavanger vurderte å melde Stavanger-politiet til Spesialeininga for politisaker, for forsøming i tenesta. Kvifor blir det ikkje politimelding likevel?

– Ei politimelding må sendast til spesialeininga, som igjen må ta ei vurdering om dette er eit straffbart forhold. Det vil ta tid. Det beste er nok å la det gå som ei klage, for det er jo mange forhold som speler inn, seier Bjelland.

Skulda for hatkrim

Medan politimeisteren ser på MIFF-klagen, har organisasjonen sine eigne problem, som til dømes ei politimelding om hatkriminalitet frå MIFF-demonstrantar.

Organisasjonen har ikkje høyrt noko frå politiet i saka ennå, men motdemonstrantar har delt videoar av MIFF-arar som dei meiner oppfører seg uakseptabelt.

Bjelland har heller ikkje drive intern gransking for å finna moglege gjerningspersonar.

– Du sa på MIFF-arrangementet at MIFF representerer dei siviliserte i denne konflikten. Kva konsekvensar får det, viss det viser seg at MIFF-arar har slått og ropt rasistiske skjellsord?

– MIFF kan ikkje vere kjent av personar med ein slik oppførsel. Uansett kva situasjon dei er i og kva dei meiner, kan dei ikkje oppføre seg på den måten. Det er heilt uhaldbart, viss det stemmer, seier Bjelland.

Han fortel at oppførsel i demonstrasjonar var tema på MIFF sin konferanse i Oslo også tidlegare i mai.

– Alle har ansvar for korleis dei oppfører seg og kva som ramlar ut av munnen på dei. Det kjem me til å vere veldig tydelege på framover, og så får me venta på kva politiet seier i denne aktuelle saka, seier Bjelland.

Vurderer eige vakthald

Neste planlagde markering i regi av MIFF Stavanger er i samband med krystallnatta i november, men det kan komme markeringar før den tid også.

– Er det aktuelt å stille med eigne tryggingsvakter framover?

– Me må nok ha ein gjennomgang av heile tryggleiken rundt MIFF sine arrangement. Me kan absolutt vurdere eigne vaktar, men det er politiet som har ansvaret for tryggleiken. Det er dei som kan komme med reaksjonar viss situasjonen kjem ut av kontroll, seier nestleiaren i MIFF Stavanger.

Zaher Hammoudeh, ein av motdemonstrantane, skriv i Stavanger Aftenblad, at også dei kjem til å gjere endringar som følgje av kaoset 14. mai.

«Vi skal i fremtiden ta i betraktning MIFFs manglande vakthald og deres avvisning på samarbeid rundt tryggleik, og planleggje enda betre vakthald ved neste motdemonstrasjon, slik at aktivistar på begge sider kan demonstrere på en sikker måte».