– SVs abortforslag er heilt grotesk
Påtroppande Frp-leiar Sylvi Listhaug tek sterk avstand frå SVs vedtak om å utvide abortgrensa, men understrekar at Frp stiller representantane sine fritt.
I morgon startar landsmøtet i Framstegspartiet. Valet av etterfølgjaren til Siv Jensen er den store saka.
Sylvi Listhaug ligg an til å ta over eit Frp som slit med oppslutnaden.
Annonse
– Det er ei formidabel oppgåve, seier Listhaug som er gjest i Dagen-podkasten Tore og Tarjei denne veka.
For mai har partiet eit gjennomsnitt på ti prosent, ifølgje Poll of Polls.
Høyr heile intervjuet med Listhaug her:
– Forkasteleg frå SV
I vekene før landsmøtet har abortsaka har prega den norske politiske debatten. Landsmøtet til Arbeidarpartiet vedtok å utvide grensa for sjølvbestemt abort til veke 18 i svangerskapet. Landsmøtet til SV gjekk innfor å setje grensa i veke 22.
– I Frp stiller alle fritt til å meine det dei vil om abort. Sjølv må eg seie at eg meiner forslaget til SV er heilt grotesk, at du skal sleppe laus fri abort til veke 22. Det er omtrent på same tidspunkt som du kan redde barn. Det synest eg er heilt forkasteleg, seier Listhaug.
– Eg føretrekkjer dagens abortlov og synest denne har fungert godt i Noreg, legg ho til.
Forsvarer bio-ja
Annonse
I fjor fekk Listhaug kritikk frå verdikonservative fordi at ho røysta med fleirtalet som liberaliserte bioteknologilova. Det inkluderte mellom anna om eggdonasjon og kunstig befruktning for einslege kvinner. Begge deler hadde Listhaug sagt at ho var imot.
– Har du angra etterpå?
– Nei, når du er nestleiar i partiet, og du har ein situasjon der det kan kome til å slå begge vegar, då må du stille opp for det fleirtalet som har røysta igjennom dette i partiprogrammet, seier ho.
Når det først gjekk slik er ho glad for at vedtaket er «godt innramma», til dømes med krav om kjennskap til donor.
– Det er ikkje frislepp til å lage barn i eit laboratorium, seier ho.
Misunningsretorikk
Listhaug legg vekt på at låge skattar og avgifter, rom for verdiskaping og grenser for offentleg sektor er avgjerande for Noreg framover.
– Kva står i vegen for at Noreg kan skape meir verdiar?
Annonse
– Eg synest det er veldig synd med misunningretorikken som venstresida brukar mot dei som skaper verdiar, seier Listhaug.
Ho meiner skattesystemet premierer utanlandske eigarar og at dette er feil.
– Frå venstresida vert det gjerne innvendt at Frp og høgresida har ein politikk som er driven av egoisme?
– Nei, tvert imot. Å drive verdiskaping og sikre arbeidsplassar kjem alle til gode, seier ho.
– Kan ikkje redde verda
Listhaug varslar at ho vil prioritere opp det ho kallar velferdsmodellens kjerneoppgåver, først og fremst norsk helsevesen.
Nedprioriteringane er bistand, innvandring og integrering og «symbolske klimatiltak».
– Noreg kan ikkje redde heile verda. Vi må også sørgje for at folk her heime får det dei treng, seier ho.
Annonse
– Du har sjølv som statsråd vore og sett på tilhøva som mange flyktningar lever under. Mange nordmenn vil seie: Vi lever i verdas beste land, finst det ikkje andre ting vi kan kutte på enn det som går til dei aller fattigaste i verda?
– Dessverre brukar vi veldig mykje pengar på å ta nokre få til Noreg, medan det sit millionar i flyktningleirar og nærområda som ikkje får hjelpa dei treng. Vi har eit asylsystem som gjer at dei som har råd å betale menneskesmuglarar, kan reise til Europa og få eit betre liv, medan alle andre sit igjen i desse leiane utan å få nok, svarer ho.
FN-kutt
Listhaug meiner kutt i bistanden kan kombinerast med meir hjelp til menneske på flukt.
– Men må det ikkje bli mindre til desse også dersom Noreg skal kutte i bistand for å bruke meir pengar til eiga velferd?
– Nei, for sjølv om vi kuttar i bistandsbudsjettet, kan vi omprioritere dei pengane som går der, for eksempel sende mindre pengar til alle moglege FN-organisasjonar som jobbar med alt mogleg rart, seier ho.
Ambassade til Jerusalem
– Kva løfte vil du gi til dei som er opptekne av Israels sak?
Annonse
– Frp kjem alltid til å stå opp for Israels rett til å eksistere og forsvare seg. Det er ikkje dermed sagt at vi skal forsvare alt Israel gjer, men vi veit at dei er under sterkt press. Dei er omringa av land i Midtausten som til og med ønskjer å utslette dei, seier Listhaug.
Ho ser positivt på fredsavtalane som er komne dei siste åra, men ser samstundes med uro på aukande utslag av antisemittisme i verda og i Noreg.
– Korleis ser du på å flytte den norske ambassaden frå Tel Aviv til Jerusalem?
– Det har vi programfesta no, det er i alle fall det som skal verte vedteke no til helga, seier ho.
Listhaug viser til at USA og nokre andre land har gjort dette.
– Det har vist seg å gå veldig bra, og det synest vi absolutt at Noreg også bør gjere.
Kristen uro
– Ein del kristne uttrykkjer uro for at det vert mindre rom for tradisjonell kristen overtyding i det norske samfunnet. Forstår du denne uroa?
Annonse
– Ja, eg skjønar på mange måtar det. Det har samanheng med ytringsrommet som vert smalare heile tida, seier Listhaug og viser til at ho personleg har erfaring med dette. Denne utviklinga kallar ho skremmande.
I podkasten snakkar ho også mellom anna om rusreforma, korleis ho forstår kristne verdiar og islam i Noreg.
Høyr heile intervjuet i iTunes, Spotify eller på andre plattformer som leverer podkast. Det finst også på dagen.no.
