Tilbydde gratis abort og sterilisering under landsmøtet til Demokratane

Dei to første dagane av landsmøtet til Demokratane i Chicago var organisasjonen på plass med ein buss som tilbydde mellom anna abortinngrep, sterilisering og kjønnsskiftebehandling.

Siktemålet er ifølgje ei pressemelding å vise kva som er mogleg når statar som Illinois «arbeider for å støtte, heller enn å avgrense, tilgangen til rimelege helsetenester».

– Illionois har teke imot fleire pasientar som søkjer abortomsorg enn nokon annan stat, og Planned Parenthood i Illionois held fram med å ta imot den veksande straumen av pasientar som er tvinga til å reise frå heimen sin for å få grunnleggande tenester som abort og kjønnsbekreftande behandling, seier president Jennifer Welch i Planned Parenthood of Illinois.

Restriksjonar i fleire delstatar

To år er gått sidan Høgsterett i USA omstøytte dommen frå 1973 som førte til at abort måtte vere lovleg i alle delstatar i landet.

No er det opp til kvar einskild stat å vedta lovgiving.

14 statar har innført nærast totalforbod mot abort, ifølgje Guttmacher Institute. I tillegg har 17 statar innført forskjellige nivå av restriksjonar.

Fleire store amerikanske medium har skrive om bussen i Chicago, mellom anna NRP, USA Today og CBS. Ifølgje sistnemnde var mellom 20 og 30 pasientar innom bussen medan han stod parkert nær landsmøtet måndag og tysdag.

Det demokratiske partiet har i aukande grad lagt vekt på retten til fri abort som ei kampsak. Samstundes har fleire verdikonservative, mellom dei tidlegare visepresident Mike Pence, reagert på at Republikanarane i den nye partiplattforma si har tona ned utsegner mot abort.

– Demonisk

Bussen møtte også motdemonstrantar.

– Dette er ein veldig alvorleg og ein veldig kompleks situasjon som blir trivialisert av Planned Parenthood, seier leiar John Mice i Americans United for Life til Fox News Digital.

Han omtalar framstøyten som eit karneval og «litt av eit show» som tonar ned alvoret.

Fleire kristne leiarar reagerte sterkt på Twitter/X. «Demonisk», «uhyggeleg» og hjarteskjerande» er nokre av karakteristikkane som er brukte.

«Det er demonisk at abortinngrep skal bli like ukomplisert som ein tacobil på landsmøtet til Demokratane», skriv etikkprofessor Andrew T. Walker ved Souther Baptist Theological Seminary ifølgje Premier Christian News.

I juni kunngjorde Planned Parenthood ifølgje AP at organisasjonen vil bruke 40 millionar dollar, altså rundt 420 millionar kroner, på valkampen til Demokratane.