Tildelt mediepris for påskegudstenester

Medierosen 2022 går på deling til Salhus kyrkjelyd nord for Bergen for gudstenestene som vart tv-sendt frå kyrkja der sist påske, og NRK som produserte sendingane.

Tildelinga av prisen finn stad på bakgrunn av både innkomne stemmer og andre tilbakemeldingar etter gudstenestene.

Positiv respons

Det er organisasjonen Tro og Medier som deler ut Medierosen éin gong i året, og dagleg leiar Jarle Haugland vil stå for utdelinga av årets pris på eit eige arrangement i Salhus kyrkjelyd 4. oktober. Der vil NRK og dei ansvarlege i kyrkjelyden vere representerte.

– I årets påskegudstenester formidla dei ein sentral bodskap på ein måte som begeistra og engasjerte sjåarane, fastslår Haugland på bakgrunn av responsen frå dei som følgde sendingane.

Tro og Medier fekk sjølv mange positive tilbakemeldingar etter desse sendingane, og Haugland er derfor ekstra glad for at NRK i haust har starta med faste tv-sende sundagsgudstenester på NRK1, den første 4. september.

Han meiner publikum sine reaksjonar i etterkant av påska syner at «slike programmer har en viktig og positiv plass i NRKs sendeskjema», som det heiter i ei pressemelding frå Tro og Medier i samband med tildelinga.

– Vonarleg vil NRK oppleve dette som ei stadfesting av at denne satsinga er rett, seier Haugland.

For andre gongen

Tidlegare har NRK berre sendt gudstenester på fjernsynet når det er høgtider. No får seks kyrkjelydar fastmonterte kamera som skal fjernstyrast frå NRK sitt studio i Trondheim. Det gjer produksjonen enklare.

Fem kyrkjelydar i Den norske kyrkja og éin i Pinserørsla er plukka ut til å vere med. NRK har ifølgje avisa Dagen sett etter prestar med god formidlingsevne og kyrkjelydar med gode musikkrefter.

– Vi ynskjer å gjere gudstenestene meir tilgjengelege for alle. Når vi sender på tv, vil òg dei som høyrer dårleg kunne få med seg innhaldet, fordi vi kjem til å tekste programma, seier Gudbjørn Bondhus, tv-produsent og gudstenestekoordinator hjå NRK Livssyn, til avisa.

Han er koordinator for gudstenestene som no skal produserast og ein av dei som no vert heidra for arbeidet sitt med livssynsstoff frå NRK. Det er faktisk ikkje fyrste gongen Bondhus får ros frå Tro og Medier på denne måten. Det fekk han òg i 2017 då han var medansvarleg for radioprogrammet Salmer til alle tider på NRK P1. Bondhus, som bur i Trondheim og arbeider for NRK derifrå, er takknemleg for ny ros i år, men tonar ned sin eigen innsats.

– Det er svært hyggeleg å få Medierosen. At folk har stemt fram påskegudstenestene frå Salhus, syner at desse tre gudstenestene har gitt sjåarane og lydarane noko dei har sett pris på. Det er akkurat det vi er ute etter med det vi produserer, seier han.

I kyrkjelydsbladet Kyrkjehelsing seier Bondhus at eit snitt på kring 300.000 menneske lyder til radiogudstenesta ein vanleg sundag. Når gudstenestene vert sende på tv, utvidar «kyrkjelyden» seg med endå 100.000.

– Dyktig gjeng

Også Salhus kyrkjelyd får god omtale. Bondhus kallar dei «en engasjert og dyktig gjeng», både når det gjeld det musikalske og det andre innhaldet.

– Eg synest det er viktig å understreka at produksjonsteamet frå NRK i Bergen og folka frå kyrkjelyden skal ha det aller meste av æra for at desse gudstenestene vart tildelt denne prisen, seier han.

NRK-producer Lars Chr. Wallace følgjer opp:

– Vi i NRK synest sjølvsagt dette er veldig stas, men først og fremst er det Salhus kyrkjelyd som har æra for dette. Dei har sett saman mange gode, lokale krefter, og resultatet vart suverent. Samarbeidet med kyrkjelyden var strålande, og alle hadde det kjekt på jobb dei dagane opptaka varte, seier Wallace.

Bondhus har registrert dei gode tilbakemeldingane etter gudstenestene i påska.

– Nokre meldingar er komne direkte til NRK, andre har skrive i kommentarfelt på nettet. Så det er tydeleg at folk set stor pris på det, seier han.

– Betyr kjempemasse

Også Salhus kyrkjelyd er glad for prisen frå Tro og Medier som i år vert delt ut for 21. gongen. Sokneprest Hanne Kanchan Zimmermann Ølberg synest det er veldig stas med ein slik pris.

– Det betyr kjempemasse, tusen takk, seier ho på vegner av dei tilsette og kyrkjelydsrådet.

– Då vi vart utfordra av NRK til å ha gudstenester i påska, vart vi fort einige om at hovudmålet vårt måtte vere å lyfte Jesus fram på ein god og naturleg måte. Dette har vi fått veldig mange gode tilbakemeldingar på at vi lukkast med. Det er svært hyggeleg at Tro og Medier også har lagt merke til kor mange som vart nådd med desse gudstenestene og kor godt samarbeidet mellom Salhus kyrkjelyd og NRK fungerte, seier Ølberg og skryt av NRK:

– Vi kjende oss sett og høyrd med ynskja våre. Dei heia på oss og sette stor pris på at vi brukte lokale krefter. Dei var tydelege på at jobben deira først og fremst var å vise fram våre gudstenester på den best moglege måten. Dette gjorde dei heilt strålande, seier ho.

Ølberg heiar på NRK som framover skal sende fjernsynsgudstenester kvar sundag.

– Eg trur folk flest – med unnatak av nokre som ropar høgt – set stor pris på dette og har sakna gudstenester på tv. Derfor er det kjempebra av NRK å satse på det.