Tips frå Jarle Mong: Skriv din eigen nekrolog

Ein ball susar over nettet på beachvolleybana ved Framnes kristne vidaregåande skule. Jarle Mong spelar på lag med kona Olene. Konkurranseinstinktet er høgst intakt hos den avdanka fotballspelaren.

Elevane på den andre banehalvdelen skal ikkje få noko gratis.

– Det vart jo siger, det håper eg de fekk med dykk, påpeikar Jarle Mong muntert i Dagen-podkasten Tore og Tarjei.

Heile intervjuet med Jarle Mong kan du lytte til på Spotify, iTunes eller andre tenester som formidlar podkast. Du finn det også på dagen.no.

Hjarte for menn

Læraren og skribenten er gjest i den nyaste episoden. Der fortel han om boka «Mer mann» som kjem ut på Sambåndet forlag denne veka.

– Eg vart tidleg involvert i mannsarbeid og fekk hjarte for menn, seier Mong.

Gjennom mange år har han vore synleg som debattant i Bergens Tidende, Stavanger Aftenblad og Jærbladet. Det siste året har han også skrive for Dagen.

Let kona køyre

Mong meiner mannsrolla er eit tema som fortente meir merksemd enn berre kortare artiklar i dagspressa. Derfor har han samla det han ser som strøtankar om mannsrolla i ei tid der mange er usikre på kva denne bør innebere.

– Eg trur det mannsidealet og den manndommen som Jesus modellerer, er meir trengd enn på lenge i denne forvirringa, seier han.

Sjølv opplever ikkje Mong å vere spesielt maskulin. Han er ikkje spesielt praktisk, ikkje særleg sterk og kona sit bak rattet når dei skal på langtur.

– Eg vil vere forsiktig med å skissere opp for smale kjønnskategoriar, understrekar han.

Øver seg med nekrolog

For å finne ut kva retning han vil ha i livet, har Mong valt å skrive sin eigen nekrolog.

Der skisserer han korleis han helst vil bli hugsa som ektefelle, far og medmenneske.

«Alle kunne se at Jarle var glad i Jesus, han benyttet alle anledninger til å dele evangeliet. Det som styrte Jarles valg og handlinger, var kjærligheten til Gud og menneskene rundt ham», heiter det i avslutninga.

– Å skrive sin eigen nekrolog er ei veldig god øving for å finne ut kva du lengtar etter. Det er ingen som angrar på at dei klipte plenen litt for sjeldan, seier han om livsrekneskapen.

Teikn til mannsvekking

Målet med boka er å løfte fram eit kristent mannsideal og inspirere til å bli betre kjend med Jesus.

– Eg ser ei slags mannsvekking. Starten er at vi begynner å snakke sant om livet, seier Mong.

Han trur det er behov for at menn kjem saman og opnar seg for kvarandre om ting dei strevar med. Det har han opplevd verdien av for eigen del. Og han ser det same for elevane på Framnes gjennom dei kristne gruppene kalla «Krigarane».

Kvinner som påhengsmotorar

– Men somme vil seie at ein del kristne miljø er mannsdominerte?

– Eg ser at det ofte er kvinner som er påhengsmotorar for mellom anna trusopplæring i heimen. Mannen er heller ein brems, seier Mong.

Han medgir at kvinner ikkje nødvendigvis har plass i hyrde- og eldsteråd, men at det elles er dei som blir sitjande med mykje av ansvaret.

– Menn må involvere seg meir. Mannen skal vere prest i heimen og ta ansvar for trusopplæring, seier han.

Skribenten understrekar at han ikkje hyllar noko brutalt mannsideal.

– Som kristen mann må du vere tydeleg på at du er underordna ein annan autoritet, seier han.

Motstemme i pressa

For Mong handlar mannsidealet også om å vere frimodig om det han trur på.

Berre knappe to år er gått sidan familien Mong flytta til Norheimsund og dermed fekk Bergens Tidende som regionavis. I løpet av denne tida har han hatt eit titals debattartiklar i avisa der han er tydeleg med sitt kristne utgangspunkt.

Få andre gjer noko tilsvarande.

– Kvifor ønskjer du å vere ei motstemme?

– Det er sikkert ei masse vikarierande motiv med ønske om stadfesting og klapp på skuldra. Men eg vil formidle sanning. Og eg kan ikkje la vere å bli engasjert i verdispørsmål, seier han.

Vil gjere folk nysgjerrige

Erfaringa er at det kan vere langt fleire som er opne for å lytte til det han har på hjartet, enn det mange kristne verkar til å tenkje.

– Eg ønskjer ikkje at trua mi skal verte privatisert. Eg trur kristendommen er sanninga og byggjer det beste samfunnet.

– Somme tenkjer kanskje at andre blir mindre nysgjerrige dersom kristne engasjerer seg i kontroversielle spørsmål?

– Eg kjøper ikkje den forklaringa. Snarare trur eg det er tvert motsett. Mi oppleving er at kristendom og kristen tru blir meir og meir eksotisk.

Han erfarer at dei fleste veit svært lite om Bibelen og kristne trussanningar.

– Eg vil pirre nysgjerrigheita. Eg ser ikkje på dette som støy, men som starten på ein utruleg interessant samtale.