Torger (16) og kompisane fekk ikkje plass i mannsutvalet. Slik vil dei løyse problema til norske menn
Mannsutvalet vil ha mindre kjønnsforskjellar. Tryggheim-gutar vil ha meir. Men på eitt område saknar dei likebehandling.
Publisert
Sist oppdatert
– Det verste med å vera ung mann i dag er forskjellsbehandlinga, som gutar og jenter får på skulen, seier bygg- og anleggselev Daniel Askvik (16) på Tryggheim vidaregåande skule.
Med glinsande dollarsmykke og elvisparykk tek Askvik imot Dagen på Kristeleg folkeparti Ungdom (KrFU) sitt arrangement, Pizza og politikk.
Annonse
Det er fisketorsdag på internatet, så oppmøtet er godt.
Bakarst i rommet sit gutane på yrkesfag.
Dei er glade for at det nå har komme ein rapport som set mannen i fokus.
Menn og likestilling
Onsdag 24. april la det regjeringsutnemnde Mannsutvalet fram sin rapport «Likestillingens neste steg».
Her gjer utvalet greie for menn sine likestillingsutfordringar og kjem med forslag til løysingar.
Ingen unge menn
I utvalet sit 17 menn, kvinner og ein ikkjebinær med titlar som komikar, dagleg leiar, direktør, lege, fagkonsulent, politisk rådgjevar, orlogskaptein og prosjekteringsleiar.
Annonse
Men ingen menn under 25 år har fått plass i utvalet.
Menn med praktiske yrke er heller ikkje representerte, forutan folkemusikaren Aasmund Nordstoga, som også er bonde.
Dagen tek derfor turen til dei unge mennene på bygg- og anleggsteknikk på Tryggheim vidaregåande skule, i hjartet av Nærbø, ei bygd som er kjend for sin machokultur.
På veg frå togstasjonen passerer Dagen rånebilar, ein muskelbunt på trappa til den lokale gymmen og ein mann med tresko på føtene og gatekjøkenmat i handa.
Så kjem me til Tryggheim.
To-tre unge menn morar seg med å kaste småstein på ein lyktestolpe i skulegarden, men det er inne på KrFU-arrangementet at me finn dei fleste elevane.
Dagen vil vita kva tryggheimgutane meiner er dei største likestillingsutfordringane for unge menn i dag. Og kva som er løysinga.
– Får ikkje same tilliten som jenter
Annonse
– Lærarane er ikkje like strenge på anmerkningar på jenter. Og jentene får gå ut av klasseromma og jobba med faga, dei treng ikkje vera i klasserommet, slik som oss gutane, seier Håkon Sivertsen Lauvsnes.
Torger Lauvvik er einig.
– Jentene på helsefag blir vist mykje større tillit enn gutane på yrkesfag, seier han.
– Det er fordi jentene blir oppfatta som meir vaksne, trur Tobias Lunde (16).
Både gutar og jenter seier seg einige.
– Men me har bygd oss opp denne respekten over tid, forklarer ei av jentene og vender seg til gutane:
– Det kan de og gjera, men de vel å ikkje gjera det.
Øver seg på å vere opne
Annonse
Tradisjonelle kjønnsroller og forventningar til maskulinitet er noko av forklaringa på at menn kjem dårlegare ut på fleire område, ifølgje mannsutvalet.
Menn kan oppleva press på å visa styrke og unngå sårbarheit, ifølgje rapporten.
Men det vil ikkje tryggheimgutane ha på seg.
– Me går i bibelgruppe og blir veldig godt kjende. Me er opne om alt, seier Tobias Lunde.
Bibelgruppa han snakkar om heiter Krigarane og er berre for gutar.
Gutane fortel at dei gjennom gruppa får øve seg på å vere opne med kvarandre.
– Etter eg begynte på Tryggheim er eg blitt meir kristen og meir mjuk, seier Daniel Askvik.
Håkon Sivertsen Lauvsnes trur det er lettare å vise sårbarheit når dei deler livssyn og bur på internat saman.
Annonse
– Det er kanskje vanskelegare for gutar på offentlege skular. Dei tenkjer nok meir at dei må ha ein status som kule, spekulerer Torger Lauvvik (16).
– Her på Tryggheim kan me vere som me er. Ingen bryr seg om du er kul eller ikkje.
Kjem dårlegare ut
Den ferske rapporten peikar på fleire område der menn blir hengande etter:
Helse: Menn er overrepresenterte blant dei som opplever sosial isolasjon, kriminalitet og demokratisk utanforskap. Dei har kortare forventa levetid enn kvinner, er meir utsett for vald, har høgare risiko for helseproblem som rus og ulukker, og dei brukar helsetenester mindre.
Fritid: Det er kjønnsforskjellar knytt til frivillig arbeid, kulturtilbod og deltaking i organiserte fritidsaktivitetar.
Utdanning og arbeidsliv: Menn presterer generelt dårlegare enn kvinner på skulen, har høgare fråfall på vidaregåande og lågare utdanning. Dei er overrepresentert i mannsdominerte yrke og har høgare risiko for arbeidsrelaterte skader.
Familieliv: Menn deltek mindre i omsorgsarbeid i heimen og speler ein mindre rolle som omsorgspersonar etter samlivsbrot.
Annonse
Men det finst håp.
Mannsutvalet sine løysingar
Utvalet anbefaler 35 tiltak som skal lette kvardagen til norske menn.
Likestillingspolitikk: Mannsutvalet vil at lova skal endrast til «å gjelde alle kjønn», ikkje berre kvinner.
Helse: Det skal bli lettare for menn å ta kontakt med helse- og omsorgstilbod. Hjelpetilboda til menn som utøver- og blir offer for vald må betrast.
Utdanning og arbeidsliv: Ulike tiltak i barnehage, skule og høgare utdanning skal hjelpe menn å velje å arbeide i kvinnedominerte yrke.
Menn som omsorgspersonar: Leggje til rette for at menn kan vera likestilte omsorgspersonar, også etter samlivsbrot.
Blir vist tillit i fjøset
Annonse
På Tryggheim er pizzaen oppeten. No er det tid for «stedling».
Daniel Askvik, og fleire med han, skal på jobb. I fjøset.
Han inviterer med seg både Dagens utsende og medelevar til gards. Dei fleste av dei unge mennene er avløysarar sjølv, ved sida av skulen.
I fjøset må elvisparykk og dollarsmykke vikje for fjosdress og støvlar.
Her nyt Askvik stor tillit, både hos bonde og buskap. Han har fått høyre at han er flink med dyra og har god arbeidsmoral.
16-åringen strenar bort til kyrne, klappar dei forsiktig og grip tak i ei måke. Kompisane tilbyr seg å ta «stedlet» ilag med han.
– Eg måkar, seier Lauvsnes.
– Eg kan strø, seier Lauvvik.
Annonse
Så er dei i gang.
Tryggheim-gutane sine løysingar
Utvalet vil redusere kjønnsforskjellar i familieliv, utdanning og arbeidsliv, som del av løysinga på menn sine likestillingsutfordringar.
Tryggheimgutane vil gå motsett veg.
– Me må ha tydelegare kjønnsroller, seier Torger Lauvvik.
Han får støtte av kompisane.
16-åringane meiner at mannen skal vere overhovud og forsørgje familien.
– Er ikkje det eit tyngande ansvar å ha hengande over seg på veg inn i vaksenlivet?
Annonse
– Heimane og skulane må byggje karakter hos gutar frå dei er barn. Dei kan godt stille krav, men vis tillit og, så går det godt, seier Lauvvik og gutane i fjøset på Nærbø.
