Treng ikkje 100.000 frå Kyrkjerådet for å finne ut korleis dei skal køyre saman i elbil

Sokneprest Hans Johan Sagrusten og organist Reidar Svare køyrer saman til gudstenester og gravferder i bil med «zero emission».

– Det er berre triveleg, seier presten.

Dagen fortalde fredag at Den norske kyrkja brukar 400.000 kroner i fire kommunar, der ein skal finna ut korleis kyrkjeleg tilsette skal reisa meir miljøvenleg med bil. Kvar av fellesråda får 100.000 kroner til forsøket.

Eit stikkord er samkøyring, eller som avdelingsdirektør Jan Christian Kielland sa det til Dagen fredag: Prest og organist må gjerne køyre saman i staden fori kvar sin bil.

– Dette har vi gjort lenge i Lom – utan 100.000 frå Kyrkjerådet for å finne ut korleis det skal gjerast, seier sokneprest Sagrusten.

– Det viktigaste

Kyrkjemøtet vedtok i fjor eit ambisiøst mål: Klimautslepp frå eiga reiseverksemd skal kuttast med 60 prosent innan 2030. Reduksjonen skal skje på fleire måtar, mellom anna ved å få fleire til å køyre saman i elbilar når dei er på jobb.

Stort flertall på Kirkemøtet: Vil ha slutt på norsk oljeleting

I dag brukar mange kyrkejelege medarbeidarar eigne bilar i tenesta, og desse går gjerne på bensin og diesel.

– Det viktigaste med ordninga er å erstatte fossilbilkjøring med elbilkøyring. Så er det også sånn at når ein får samarbeid mellom arbeidsgivarlinene, er det mykje enklare å samkøyre, seier avdelingsdirektør Jan Christian Kielland i Kyrkjerådet.

Ståande avtale

Då soknepresten las om saka i Dagen, skreiv han straks til oss og fortalde om korleis han og organisten køyrer saman til gudstenester og gravferder.

Fredag var det gravferd frå Lom stavkyrkje, som ligg i gangavstand frå kyrkjekontoret. Difor fekk bilen kvila denne dagen. Dei to andre kyrkjene, Garmo og Bøverdalen, ligg høvesvis 13 og 20 kilometer unna. Til gudstenester og gravferder er det hovudregelen at prest og organist køyrer saman og helst i prestens elbil.

– Den ståande avtalen er at Reidar brukar å sitje på med meg. Kvelden før tekstmeldar vi om tidspunktet, fortel Sagrusten.

Eit lite møte i bilen

Soknepresten reknar seg fort fram til at han køyrer rundt 2500 kilometer i tenesta kvart år.

– Bilturane er også eit lite møte, der vi går gjennom arbeidsoppgåvene på vegen til kyrkja. Og evaluerer på veg heim att, fortel han.

Sagrusten trur mange gjer som dei og utan ein treng stimuleringsmidlar frå sentralt hald.

– Det er berre å setje i gang. Eg ser berre fordeler med ei slik ordning. Det er triveleg, praktisk og miljøvenleg. Og det er jo heilt unødvendig å køyre to bilar når ein skal same vegen til same tid, resonnerer han.

– Kva tenkjer du om at Kyrkjerådet brukar 400.000 kroner på å finne ut korleis ein skal samkøyre i elbil?

– Det er berre positivt. Men her i Lom og sikkert mange andre stader ligg tilhøva så greitt til rette at det er berre å gå i gang utan drahjelp utanfrå. Det er forholdsvis korte avstandar mellom dei tre kyrkjene, og vi er totalt sju tilsette på kyrkjekontoret. Det er sjølvsagt annleis på større stader med større avstandar og mange fleire medarbeidarar, svarar han.

Liv og lære, og Johannes openberring

Sagrusten er mest kjend for sitt arbeid med bibel og bibelomsetjing. Han har skrive ei rad bøker om bibelspørsmål og fleire diktsamlingar. Siste boka kom i år og handlar om Johannes openberring, som han meiner er ei bok å spegle seg i også i høve til klimakrisa.

Oppdaga si eiga tid i Johannes' openberring

– Openberringa vil dengje likesæla ut av oss, sa han ved lanseringa.

– Går det ei line frå Johannes openberring til miljøvenleg transport i kvardagen, Sagrusten?

– Ja, det er klart det må vera samanheng mellom livet og læra, mellom teologien og handlingane våre. Når Openberringa syner oss all den lidinga som oppstår når naturen bryt saman, då må vi òg prøve å ta vare på naturen vi har rundt oss, svarar han.