Utfordrar «mytar» om den offentlege skulen
Rektor Brynhild Samuelsen ved den kristne friskulen Tryggheim Strand meiner det ikkje er så opplagt kvifor den offentlege skulen er ein fellesskule.
Nokre hundre meter forbi Tau i Rogaland ligg skulen som i sju år har halde til i brakker og leigde lokale i idrettsanlegget. Til hausten skal dei flytte inn i splitter nye lokale i sentrum.
– Det blir veldig kjekt, seier Ingrid Annéa til Dagen. Ho går i femte klasse og sit i elevrådet.
Annonse
Elevrådet har mellom anna kome med innspel til korleis det nye uteområdet skal bli. Dessutan er dei engasjerte i misjonsprosjektet dei støttar i Peru.
– Vi veit ikkje om det kan vere heilt skikkeleg i år heller, seier ho med tanke på koronasituasjonen. Men målet er likevel å samle inn det dei kan til prosjektet.
Elevane er også engasjerte i innhaldet i skulen.
Sebastian i åttande klasse, som også sit i elevrådet, var i fjor med i ei gruppe elevar som skreiv brev til rektor med spørsmål om dei kunne slutte med lekser. Løysinga vart det ein kallar ein «leksefrisk» skule, noko som inneber at dei stort sett har kutta heimearbeid.
Hadia Tajik
For folk utanfor skulekvardagen og lokalsamfunnet vart Tryggheim Strand sett på kartet i haust. Nestleiar Hadia Tajik i Arbeidarpartiet skreiv om skulen i boka «Frihet». Bakgrunnen var at ho er oppvaksen i Bjørheimsbygd, berre seks-sju kilometer unna.
Noko av det Tajik undra seg over, var at ein slik skule dukka opp midt i bibelbeltet. Ho besøkte også rektor Brynhild Samuelsen for å finne ut meir om dette.
– Eg er ikkje overraska over spørsmålet. Eg forstår at nokre kan tenkje slik, seier Samuelsen til Dagen. Ho er gjest i den nyaste utgåva av podkasten Tore og Tarjei.
Annonse
Men rektoren meiner ein kan snu på det: Sidan skulen ligg midt i bibelbeltet, og i ein kommune med spesielt sterke tradisjonar for kristenliv, fanst det lokalt engasjement for å starte ein kristen skule.
Ikkje retrett
Tajik har ikkje lagt skjul på at ho er skeptisk til slike skular fordi ho meiner det kan oppstå parallellsamfunn, der folk i eit lokalsamfunn har mindre kontakt med kvarandre på tvers av skiljelinjer.
– Korleis opplever du at Tryggheim Strand finn plassen sin som ein samfunnsbyggjande aktør i dette lokalsamfunnet?
– Eg opplever meir og meir at vi gjer det. Vi var opptekne av at vi ikkje var nokre få sjeler som skulle trekkje oss vekk og skilje oss frå lokalsamfunnet, men at vi var ei gåve og eit tilskot til lokalsamfunnet, seier Samuelsen.
Samstundes legg ho ikkje skjul på at det er ulike meiningar om skulen i lokalmiljøet.
Saknar «kode»
Når det vert framheva at det skal vere mangfald i skulen, meiner Samuelsen at ein slik skule medverkar til mangfald i skule- tilbodet.
Annonse
– Eg problematiserer av og til dette med fellesskulen. Kva er det som er så likt frå skule til skule, seier rektoren.
Enten det vert behov for to skular i eit lokalsamfunn, eller ein samanliknar offentlege skular rundt i landet, meiner ho det ikkje er opplagt kva som er «koden» som er felles.
Variert elevmasse
– Ei vanleg innvending er at dette vert skular for kristne familiar der kristne barn møtest, og så mister dei kontakt med folk som ikkje er aktive i kyrkje og bedehus. Kva erfaring har du med kvar elevane dykkar kjem frå?
– Då vi starta med 21 elevar, var dei aller fleste frå kristne heimar, seier Samuelsen.
Ho viser til at det var desse som stod bak skulen.
– Men så opplever vi at vi får fleire og fleire frå alle slags heimar og miljø. Dett var jo målet vårt. Vi har sagt og seier om oss sjølve at vi ikkje er ein skule for kristne elevar, men ein kristen skule for alle elevar, legg ho til.
Forskjellige grunnar
Annonse
– Kva kan vere årsaker til at foreldre vel denne skulen sjølv om dei ikkje har ei tydeleg kristen vedkjenning eller eit sterkt engasjement i ei kristen forsamling?
– Vi opplever at det kan vere veldig mange forskjellige grunnar til dette. Nokre likar at vi er ein liten skule. Og om vi vert 200, er ikkje det ein veldig svær skule. Andre treng gjerne ein ny start. Nokre kjem for at venene går her. Det er forskjellige grunnar.
– Er det noko du tenkjer de skal vere ekstra gode på som kristen skule?
– Ja, vi snakkar ein del om kva menneskesyn vi har. Same kven du er og kva bakgrunn du har, kva styrkar og veikskapar du har, vil vi at både elevane og dei vaksne har sin plass og er viktige, seier ho.
– Strammar seg til
– Opplever du skulen som ein politisk omstridd skule?
– Ja, berre sidan vi starta for sju år sidan, merkar eg det har stramma seg til dei par siste åra. Så eg er absolutt spent og litt på vakt med tanke på framtida. Vi ønskjer å kjempe for at vi skal ha vår rett og at foreldra skal ha ein rett til å velje dette alternativet.
Heile intervjuet med Brynhild Samuelsen kan du høyre på Spotify, iTunes eller på andre plattformer som leverer podkast.
