Valdtektsanklaga fekk vere student ved misjonsbase

Tidlegare studentar ved Ungdom i Oppdrags base i Perth i Australia reagerer på at dei ikkje vart informerte om at den valdtektsanklaga skulle byrje på skulen med dei.

Saka har ført til internasjonal medieomtale og UiO-basen har bestilt ein ekstern konsulentrapport frå konsulentselskapet KPMG for å gjennomgå eigne rutinar. Saka har også ført til at ei rekkje tidlegare studentar og stab har fortalt om andre negative opplevingar frå basen.

Kvart år reiser rundt 300 norske studentar på Ungdom i Oppdrags Disippeltreningsskular, kjent som DTS, i utlandet. Ingen veit kor mange norske studentar som er på kvar base, men Dagen har vore i kontakt med to tidlegare elevar som seier at det brukar å vere rundt 10 nordmenn på Perth-basen kvart år.

Skal ha skrive brev for å hjelpe han inn

Det var hausten 2019 at den tidlegare profesjonelle rugbyspelaren Jarryd Hayne frå Australia vart teken opp som student ved Ungdom i Oppdrags base i Perth.

Han var eit kjent ansikt i Australia og hadde blitt kåra til årets spelar i den australske rugbyligaen i 2009 og 2014.

Avgjersla var kontroversiell fordi Hayne var under etterforsking for valdtekt på det tidspunktet, men retten godtok at Hayne kunne byrje på bibelskulen. Bibelskulen skal, ifølgje Australian Associated Press, ha skrive to brev som skulle hjelpe Hayne i søknadsprosessen.

Nyheitsbyrået melde at aktoren motsette seg avgjerda, då han meinte Hayne kunne utgjere ein risiko for dei andre elevane. Retten meinte derimot at risikoen vart redusert om Hayne måtte melde seg til politiet tre gonger i veka.

I tillegg måtte han bu på eit internat med utelukkande menn.

I mai i år vart den tidlegare profesjonelle rugbyspelaren Jarryd Hayne dømt til fem år og ni månadars fengsel for valdtekt av ei 26 år gamal kvinne.

Hayne har sagt seg ikkje skuldig. Han har anka dommen, skreiv The Guardian i juni.

Saka skal opp til retten igjen i november.

Alvorlege skuldingar mot skulen

I kjølvatnet av Hayne-saka har fleire alvorlege skuldingar mot DTS-basen dukka opp, både i sosiale medium og i ei stor sak i avisa The West Australian 3. juli i år. I saka fortel 20 tidlegare studentar og tilsette ved DTS-en om ulike negative røynsler frå basen dei siste 20 åra.

19 av dei er anonyme og éi fortel med namn og bilete, men alle har skrive under på at det dei fortel er sant.

Ein tidlegare student fortel at ho vart utsett for eit seksuelt overgrep frå ein medstudent på bussen på evangeliseringstur. Ho skal ha gått til ein leiar, som neste dag skal ha organisert eit møte mellom henne og medstudenten. Leiaren skal ha bede henne tilgje han.

Ei anna kvinne skal ha blitt fortalt at ho hadde Jesabels ånd i seg då ho fortalde at ho vart utsett for seksuelt misbruk i barndommen. Det bibelske namnet «Jesabel» vert, ifølgje Store norske leksikon, brukt for å karakterisere forførariske og forræderske kvinner heilt fram til våre dagar.

Leiinga ved Ungdom i Oppdrag-basen i Perth svarer i saka at dei er oppriktig lei seg for studentar og tilsette som har råka av saker der verdiane og trua deira ikkje har vore tydeleg iverksett.

— Uskuldig til det motsette er bevist

Dagen etter at dommen mot Hayne vart avsagt, publiserte YWAM Perth ei pressemelding på nettsida deira og i sosiale media.

Der uttrykkjer dei «bekymring og empati for offeret og dei som er råka av handlingane til Jarryd Hayne». Vidare skriv dei at dei behandla Hayne likt som lova: uskuldig til det motsette er bevist.

I tillegg skriv dei at dei gjorde alt som stod i deira makt for å informere tilsette og studentar og få deira tilbakemeldingar på at Hayne deltok på skulen.

Dei avsluttar med at Hayne hadde ei trusreise i løpet av dei tre månadane han var der, og at han oppførte seg uklanderleg med alle dei tilsette og studentane.

Meiner dei ikkje vart informerte

Studentar som avisa The West Australian har vore i kontakt med hevdar derimot at dei ikkje vart informerte om at Hayne skulle vere der i forkant av opphaldet.

I kommentarfeltet under pressemeldinga på Facebook fekk bibelskulen både kritikk og støtte.

12. mai publiserte YWAM Perth ei ny oppdatering. I oppdateringa, som ligg på nettsida, Facebook og Instagram, skreiv dei at ville setje i gang ei intern vurdering av prosessane knytt til opptaket.

Ikkje høyrt om i Noreg

Dagen har vore i kontakt med leiaren av Ungdom i Oppdrag Noreg, Andreas Nordli. Han var ikkje kjend med Hayne-saka før Dagen gjorde han merksam på saka.

— Korleis kjem Ungdom i Oppdrag i Noreg til å forholde seg til saka no når de har fått kunnskap om den?

— Vi kan ikkje forholde oss konkret til denne saka sidan det er på andre sida av jorda, og dermed ikkje er ein del av UiO Noreg. Vi har eigne retningslinjer i UiO Noreg, og menneske som er dømt for seksuelle overgrep får til dømes ikkje arbeide her.

— Men de høyrer til same organisasjon og går under same namn?

— Ja, men det er desentralisert. Det høgaste nivået er den nasjonale overbygninga.

— Finst det ei form sentralleiing som lagar retningslinjer for sikkerheit, teologi og andre ting som alle må følgje?

— Vi opererer fyrst og fremst verdibasert og relasjonsbasert. Teologien er enkelt fortalt utforma gjennom dei 18 internasjonale verdiane våre, men det finst ikkje retningslinjer internasjonalt som regulerer korleis ein skal handtere slike hendingar. Det er opp til kvart enkelt land.

Sjølv om organisasjonen ikkje har ei sentralleiing, har dei likevel sentrale retningslinjer for innhald, forklarar Nordli. Alle DTS-ane høyrer til «University of the Nations», som er eit kristent universitet som høyrer til i YWAM-nettverket.

— Alle DTS-ane skal difor vere 80 prosent like når det gjeld innhald, forklarar han.

— Dette har blitt ein stor internasjonal sak. Finst det ikkje kommunikasjon på tvers av basane, så ein kan lære av det?

— Det kan det vere, sjølvsagt. Det skjer viss det er ein stor mediesak ein eller annan stad. Då kan vi gjerne informere kvarandre. Men akkurat denne saka her har eg ikkje høyrt om. Eg er litt overraska over at eg ikkje har høyrt om det.

— Det er ikkje opne telefonlinjer mellom basane?

— Nei, det er berre relasjonelt.

Får ikkje vite kven som tek DTS i utlandet

Nordli forklarar at det alltid vil vere elevar som har negative erfaringar med DTS i utlandet, med tanke på at rundt 300 nordmenn reiser ut kvart år. Han har ikkje høyrt fleire negative historier frå Perth enn andre plassar.

Leiaren forklarar at det er vanskeleg for Ungdom i Oppdrag i Noreg å følgje opp elevar i andre land, då dei ikkje veit kven som tek DTS i utlandet.

— Eg har i mange år etterlyst å få kontaktinformasjon til nordmenn som tek DTS i utlandet frå University of the Nations, men det får eg ikkje på grunn av personvern, seier han.

Det einaste talet han får frå University of the Nations er talet på nordmenn som tek DTS i utlandet, noko som har vore til stor frustrasjon.

— Vi vil veldig gjerne bygge nettverk med dei som har teke DTS i utlandet.