Vekkinga i Asbury fekk global merksemd. Kva er status eitt år etter?

Eit ordinært bønemøte som «aldri tok slutt» i februar 2023 fekk mykje omtale både nasjonalt i USA og internasjonalt.

– Eg kjenner ei naud etter meir. Eg har fått ei ny begeistring for Bibelen og ein ny svolt og lyst til å søkje etter Gud, sa norske Cornelia Støle Wittussen (26) til Dagen.

Ho gjekk på ein disippeltreningsskule i USA og var mellom dei mange som reiste til Asbury.

VG var eit av mange medium frå fleire land som laga reportasje frå staden. «Studentenes bønn gikk viralt. Titusener reiste til amerikansk småby», var tittelen på artikkelen.

Dagen skreiv ei rekke artiklar om fenomenet.

Reaksjon mot uforpliktande kristendom

Eit år seinare ser president Kevin Brown ved Asbury University tilbake på perioden med djup takksemd. Han understrekar at det må bli opp til kyrkjehistorikarar å avgjere om ein skal kalle perioden ei vekking eller noko anna. Men noko er han sikker på:

– Generasjon Z viser seg som eit korrektiv til den uforpliktande kristendommen som har prega det religiøse landskapet vårt og karakterisert rørsla vår bort frå kyrkjene, skriv Brown i ein artikkel i Christianity Today.

Generasjon Z er dei som er fødde mellom slutten av 1990-talet og starten på 2010-talet.

Millionar av oppdateringar

Det nemnde bønemøtet starta 8. februar og varte i 16 dagar, altså til 24. februar. I denne perioden oppsøkte rundt 50.000 menneske småbyen Wilmore i den amerikanske delstaten Kentucky.

Ein av dei var pastor Steinar Lofnes i Jesusfellesskapet i Bergen, som skreiv om inntrykka derifrå i Dagen.

Omtale av Asbury er blitt spora i 250 podkastar, 1.000 artiklar og fleire titals talar og seminar, ifølgje presidenten. Meir enn hundre media besøkte campus, og det har vore meir enn 250 millionar oppdateringar i sosiale media om Asbury-vekkinga.

– Eg har aldri sett ei slik samling av menn og kvinner i alle aldrar, frå alle bakgrunnar og nasjonalitetar, berørte, søkjande, botferdige og sameinte, skriv Brown.

Han trur det er eit «meiningsvakuum» i USA som den unge generasjonen merkar.

– Misnøgde med status quo

Dei siste 25 åra har meir enn 40 millionar amerikanarar forlate kristne kyrkjer, ifølgje boka The Great Dechurching. Det er fleire enn summen av alle som ein reknar med kom til ei kristen omvending gjennom dei to store vekkingane i USA på 1700- og 1800-talet og alle kampanjane til verdsevangelisten Billy Graham (1918-2018).

Brown påpeikar at rundt ein firedel av desse forlet kyrkja fordi dei hadde vonde erfaringar. Tre firedeler ramla ut meir tilfeldig i samband med overgangar i livet. Ny livsfase, endra familiesituasjon eller flytting er typiske døme.

Han ser teikn til at den nye generasjonen kristne tek oppgjer med ei lite forpliktande tru.

– Det er noko seriøst med kristne i generasjon Z, og dei er misnøgde med den institusjonelle «status quo», skriv han.

I haust skreiv Dagen at Asbury University opplevde ei auka tilstrøyming av studentar for inneverande studieår.