Vil endre strenge reglar for kristne skulelag

No vil ho ta saka opp i Kristiansand bystyre.

Torsdag melde Dagen at skulelaget på Møvig skole i Kristiansand ikkje får lov til å ha møter når dei vil, invitere gjestar så ofte som dei vil eller ha matservering.

Bystyrerepresentant Welle Haugland reagerer på saka og ynskjer no å ta saka opp i bystyret så fort som mogeleg.

– Det er veldig trist at vi opplever at skuleleiinga legg band på eit viktig engasjement frå elevane. Samstundes tenkjer eg at dette ikkje kan vere tråd med retningslinjene i kommunane, seier­ ­Haugland. Ho sit også i KrFs ­sentralstyre.

Etterlyser meir fridom

Welle Haugland meiner at elevane må få meir fridom til å drive skulelaga slik dei ynskjer, og at politikarane må endre retningslinjene slik at rektorar ikkje kan legge strenge føringar for skulelaga i Kristiansand.

– Vi har tru på at elevane klarer å organisere aktiviteten sin på eiga hand, og at det er både sunt og positivt å drive med lagsarbeid. Vi må heie fram engasjert ungdom som vil dele trua si med andre, seier Welle-Haugland.

Uklare retningslinjer

Det er ulike tolkingar av retningslinjene for skulelag i Kristiansand kommune. Fagsjef i Kristiansand kommune, Roy Wiken, uttalte i går til Dagen at føringane som rektor har lagt for skulelaget på Møvig skole er i tråd med retningslinjene. Det er ikkje Welle Haugland einig i og meiner at det er eit teikn på at retningslinjene må bli tydelegare.

– Eg meiner at vi må ta ein diskusjon på om vi har gode nok retningslinjer. Det er ikkje i tråd med det Stortinget vedtok i fjor om at vi skal legge til rette for skulelag.

Ikkje klar over ­omfanget

Kristiansand KrF har lenge har vore klar over at det har vore konflikt mellom skulelaget og skuleleiinga ved Møvig skole. Ho fortel at dei har prøvd å gjere noko med situasjonen, men at dei ikkje visste at situasjonen var så ille.

– Vi har ikkje vore klar over alle detaljane. Vi visste at dei hadde oppstartsproblem og vanskar med å arrangere møte, men vi var ikkje klar over matforbodet. Difor vil vi ta opp situasjonen i bystyret fordi problemet har vore større enn vi har trudd.

Håper på støtte

Welle Haugland seier at ho trur at KrF kan få støtte frå fleire parti i bystyret om ein gjennomgang av retningslinjene, og viser til saka om bolleforbodet i Sirdal kommune, der det var eit stort engasjement frå politikarar i ulike parti.

– Eg håper at eit fleirtal i bystyret meiner at det er viktig. Vi har sett i saka i Sirdal kor breitt engasjementet kan gå på tvers av partia, seier ho.

Viktig prinsipiell sak

Demokratane sin gruppeleiar i Kristiansand bystyre, Vidar Kleppe, har også engasjert seg i saka. Han har levert interpellasjon til ordførar Harald Furre (H), på bakgrunn av Dagen sin omtale av saka.

– Eg meiner at ei så viktig prinsipiell sak for Kristiansand kommune må vi få avklart. Dette er ein god kristen frivillig organisasjon som vil ha aktivitet i skulen og så skal dei oppleve slike restriksjonar. Eg skjønar ikkje at det er mulig, seier Vidar Kleppe til Dagen.

Ble oppgitt over bolleforbud - bestilte 100 boller