Internatelevar sakna kristent fellesskap om sommaren. Det har Eivind og Håvard gjort noko med

– Det er noko me alle har sakna litt.

Eivind Bø Reinertsen (18) var ikkje vond å be, då kompisen, Håvard Vistnes (18), lurte på om han hadde lyst å bli med å dra i gang møter kvar veke gjennom heile ferien.

27. juni var dei i gang.

Kvar torsdag denne sommaren har det samla seg mellom 60 og 80 ungdommar på Randaberg forsamlingshus.

På programmet står lovsong, tale og gjensyn med vener og kjende frå heile Rogaland.

Fleire som besøkjer vener i fylket nyttar også høvet til å besøkje sommarmøta, slik som Hannah Østhus frå Oslo.

På forsamlingshuset denne kvelden møter ho Mathias Olsen og Jonas Riska.

Dei to unge mennene kjem frå ulike stader i Rogaland og blei kjende med kvarandre på den kristne internatskulen, Lundeneset VGS.

– Det er kjekt å få andeleg påfyll i kvardagen, seier Riska.

Olsen, som kjem berande på bibelen sin, er einig.

– Det er mange frå internatskular og bibelskular som har fri og er heime på ferie. Då er det kjekt å ha ein stad å møtast, seier han.

Grasrot-initiativ

Det er ingen organisasjon eller forsamling som står bak torsdagmøtene. Det er berre ungdommar sjølv, og dei kjem frå ulike kristne samanhengar.

Forsamlingshuset på Randaberg lånar dei gratis.

Denne kvelden er det tynnare i rekkjene enn det pleier å vere på torsdagmøtene, men møtet går sin gang.

På spelelista står både moderne lovsongar og Trygve Bjerkreim-klassikarar som «Han tek ikkje glansen av livet» og «Takk at du tok mine byrder».

Kvelden er sett saman av ein vokalist, ein gitarist og ein pianist.

– Fokuset er ikkje på å ha masse flashy greier. Det viktigaste er å vera saman, seier Reinertsen, som speler gitar.

Frå scenen understrekar møteleiar Håvard Vistnes at deltakarane kan gjere korleis dei vil medan dei syng saman.

Alle blir sitjande. Enn så lenge.

Denne torsdagen har Håvard Vistnes henta inn potetbonden, Thore Askvik (43), til å halda tale.

Han kjem slentrande opp på talarstolen iført badeshorts og joggesko.

I kveld skal han snakka til dei unge om kjærleik.

– Du er verd mykje. Husk det, seier Askvik.

Arbeidsnevane er knytte og stemma myndig.

Han meiner alvor.

– Kanskje kan du kjenne på at du ikkje er verd noko.

To unge jenter noterer ivrig. Ein ung mann bit negler.

Askvik held fram:

– Då må du plassere deg der du er verdifull. Hos han som døydde på korset for deg. Ikkje fordi du fortener det, men fordi han elska deg utan vilkår.

Det er stille i salen. Ikkje ein smarttelefon er å sjå.

– Ikkje bygg livet og verdien din på kva du får til. Bygg det på Gud sin kjærleik, avsluttar Askvik.

Når bøna er ferdig bryt salen ut i applaus.

Så er det nok ein gong tid for song. Ingen reiser seg denne gongen heller, før møtet er over.

Då reiser talaren seg frå fremre rad og snur seg mot ungdommane.

– Kan me ikkje ta «Takk at du tok mine byrder ein gong til? Så reiser me oss. Alle saman, seier han.

Ungdommane let seg ikkje be to gonger.

Dei fyller heile forsamlingshuset med song.

Etter ein snau time er møtet over. Trua har fått påfyll og ungdommane trekk ut i sidesalen.

Nå er det magen som skal få påfyll.

– Det er trygt å vite at me har ein stad å samlast kvar veke. Det er mykje godt vas her, seier Sander Kjølvik.

Han og Levi Bjuland har komme heilt frå Nærbø, snaue 50 kilometer lenger sør. Kompisen Andreas Skjærpe har teke turen frå Gilja, som er ein times køyretur unna. Alex Reidmar Pettersen bur i Sandnes, 23 kilometer lenger sør.

Dei er alle internatelevar frå Lundeneset og heime på ferie i kvar si bygd.

Torsdagsmøta foreiner dei.

– Å komme her etter arbeid, treffe folk, få høyre om Jesus og ikkje dette vekk frå Ordet – det gjer godt, seier Skjærpe.

Bjuland nikkar.

Han trur torsdagmøtene fyller eit behov som dei kristne festivalane ikkje kan.

– Å få eit enkelt møte, som ikkje er så stort, der du berre kan møtast og henga ilag, det er veldig fint.

Møtet 1. august var det nest siste i rekkja av totalt sju torsdagsmøte på Randaberg forsamlingshus.

Trur konseptet spreier seg

Initiativtakar Håvard Vistnes og Eivind Bø Reinertsen trur at konseptet har komme for å bli. Dei har allereie bestemt seg for å vidareføre torsdagmøtene neste sommar.

– Å ha eit fellesskap å gå til, og å samlast om det viktigaste, er godt, seier Vistnes.

Reinertsen nikkar.

– Det gir mykje å få tene andre med å dra i gang noko slik, seier han

Dei har høyrt om fleire som har lyst å starta liknande møter andre stader i Rogaland.

– Kanskje kan me slå oss saman og få til felles arrangement eller å spela fotball eller samlast på stranda og lovsyngja saman, føreslår Reinertsen.

Kristne ungdommar i fylket har allereie fleire kontaktpunkt. Fleire deler ein bibelleseplan gjennom Itro.no. 3. august er det ein felles lovsongskveld i Ålgård, også dette dratt i gang av ungdommar frå ulike kristne samanhengar.

Vistnes har spreidd ordet om lovsongskvelden til deltakarane på torsdagsmøtet.

– Me støttar opp om alle som arrangerer kristne møtepunkt om sommaren, seier Vistnes.