ETTERTANKE: Sokneprest Benjamin Bjørnsen Anda synest det er trygt å tenkje på at så mange har forkynt før han i dette kyrkjerommet.
Tore Hjalmar Sævik
Sokneprest (28) i ei av landets eldste kyrkjer opplever at Gud grip inn i dag
Gjennom skiftande tider har menneske i Giske kyrkje høyrt om Jesus som gjorde folk friske. Korleis påverkar det ein sokneprest på 28 år?
«Eg er alltid glad for å få vist fram smykket vårt!» skriv sokneprest Benjamin Bjørnsen Anda (28) i ein sms. Avtalen vert å gjennomføre intervjuet i Giske kyrkje.
Det er historisk sus over den vesle, flate øya som ligg rett over fjorden for Ålesund. Ikkje minst gjeld det den kvite steinkyrkja frå rundt år 1130, som dermed er den eldste i Møre bispedømme.
Ho var over 200 år gammal då svartedauden råka, over 400 år på reformasjonstida og nesten 700 år då Grunnlova vart skriven på Eidsvoll.
