Afrikanske biskopar protesterer mot at paven tillet forbøn for likekjønna par

Ei felles erklæring frå katolske biskopar i Afrika og på Madagaskar er den kraftigaste protesten mot signalet som pave Frans kom med rett før jul, melder nyheitsbyrået AP.

Det vart opna for at katolske prestar kan velsigne homofile par, men samstundes at ein ikkje med dette vil endre læra om ekteskapet eller legitimere homofilt samliv. I katolsk lære er ekteskapet mellom éin kvinne og éin mann forstått som eit sakrament.

Velsigningshandlingane skal heller ikkje vare meir enn 15 sekund, ifølgje The Telegraph.

Dei skal vere spontane og ikkje minne om ekteskapsinngåing.

Vatikanet tillater katolske prester å velsigne skeive par

Fryktar utgliding

Medan progressive miljø i Den romersk-katolske kyrkja gler seg over det dei oppfattar som oppmjuking i kyrkja, er konservative krinsar urolege for utgliding.

Særleg i Afrika, der talet på katolikkar veks raskare enn nokon annan stad i verda, har det vore sterke reaksjonar.

Det er upassande for afrikanske prestar å utføre slike velsigningshandlingar på grunn av «skandalen og forvirringa» dei vil forårsake, skriv den kongolesiske kardinalen i Fridolin Ambongo. Det gjer han i ei fråsegn på vegner av symposiet for afrikanske nasjonale biskopar, skriv AP.

Viser til Bibelen og kulturen

Kardinalen viser til bibelvers som fordømmer homofile handlingar og til den afrikanske kulturelle konteksten. Der meiner han relasjonar mellom menneske av same kjønn vert forstått som «eit brot med kulturelle normer og i sin natur perverse».

Kardinal Ambongo seier fråsegna er ei oppsummering av standpunkta til nasjonale bispekonferansar i Afrika.

På den andre sida har til dømes biskopane i Frankrike helsa opninga frå pave Frans velkomen. Dei meiner dokumentet frå Vatikanet «minner oss om at dei som ikkje er i posisjon til å forplikte seg til det sakramentale ekteskapet, ikkje er utestengde frå Guds kjærleik eller hans kyrkje».

Åtvarar mot forhasta slutningar

Pave Frans har seinast denne veka forsvart dokumentet som kom i desember. Han meiner det blir misforstått.

– Faren er at dersom eg ikkje likar noko og tek dette inn i hjartet mitt, kan eg bli ein motstandar og trekkje forhasta, stygge slutningar, sa paven til den italienske Kanal 9, ifølgje Reuters.

– Herren velsignar alle. Men så må menneske gå i dialog med Herrens velsigning og sjå på vegen som Herren viser. Vi må ta dei i handa og følgje dei på denne vegen, og ikkje fordømme dei frå starten, seier paven.

Velsignings-virvar frå Vatikanet