Bør kristne drikke alkohol? Prestestudent snakkar om Jesus på fest
– Eg har hatt mange gode samtalar om Gud over eit glas vin med folk som elles aldri ville gått i kyrkja.
Publisert
Sist oppdatert
I søndagens tekst møter vi Jesus då han gjer vatn om til vin.
At han sjølv drakk, veit vi. Men kva skal kristne tenke om alkohol i dag, i ein annan kultur over 2000 år seinare?
Annonse
Det har vi spurt to teologistudentar om.
Vatn til vin
Bryllaupsfesten var godt i gang, og gjestane hadde drukke opp all vinen. Det var ikkje berre flaut for vertane, men sette heile ryktet deira i spel.
Slik var kulturen den gongen.
Difor tok Jesu mor grep, og bad sonen om å ordne opp. Jesus fekk fylt opp seks vasskar av stein med vatn, som svarar til mellom 400–700 liter.
Så skjedde underet.
Plutseleg blei vatnet gjort om til vin.
Teologistudent
Annonse
Etter ei større undersøking Dagen gjorde av kristen-Noreg for tre år sidan, kunne vi avdekke at fleire og fleire aktive kristne drikk alkohol.
Ein av dei er Marianne Tomren.
Ho studerer teologi ved NLA Høgskolen i Bergen, og jobbar som prestevikar i Bønes sokn.
Sjølv om Tomren gjerne tar seg eit glas vin, meiner ho kristne bør vere måtehaldne når det kjem til alkohol.
– Drikk ein for mykje kan det vere til skade for andre, og det vil ein ikkje ha på seg, særleg som prest. Den viktigaste rettesnora Bibelen gjev oss er nestekjærleiksbodet, og det blir vanskeleg å halde dersom ein mistar kontroll over seg sjølv, seier ho.
Teologistudenten understrekar at ho har stor respekt for dei som ikkje drikk av religiøse grunnar.
Kristen på fest
Tomren likar å feste frå tid til annan, og opplever at religion ofte blir eit tema når ho kjem inn på kva ho studerer.
Annonse
– Eg har hatt mange gode samtalar om Gud over eit glas vin med folk som elles aldri ville gått i kyrkja. Mange blir veldig opne når dei har drukke. Då er det enklare å snakke om tru, seier ho.
Prestevikaren trur det at ho festar gjer noko med korleis dei ho møter ser på kristne i etterkant.
– Det er kanskje ikkje så ofte folk møter ein prestestudent på fest, som også er open for å lytte til kva dei trur på. Det bryt nok med ein del av fordommane mange har mot kristne som lukka menneske, seier ho og legg til:
– Kanskje var det noko liknande som skjedde i bryllaupet i Kanaan, der Jesus møtte folk der dei var sjølv om fleire av dei sannsynlegvis var fulle.
Drikk ikkje
Malene Skartveit studerer også teologi ved NLA Høgskolen.
Samtidig tar ho ein bachelor i gresk på Universitet i Bergen, og jobbar som barne- og ungdomsarbeidar i Norsk Luthersk Misjonssamband (NLM).
Skartveit drikk ikkje alkohol, men meiner kristne står fri til å velje om dei vil drikke eller ikkje.
Annonse
– Det viktigaste er å vere tru mot si eiga overtyding. For meg handlar det hovudsakleg om kva miljø eg har vakse opp i, ikkje om kva som står i Bibelen, seier ho og legg til:
– Det er mange som slit på grunn av alkohol. Gjennom at eg ikkje drikk, blir det kanskje enklare for andre å avstå.
Teologistudenten meiner kyrkja har eit særleg ansvar overfor dei som slit på grunn av alkohol.
– Mykje av det sosiale i vår kultur dreier seg rundt alkohol. Slik bør det ikkje vere i kyrkja. Det skal vere ein trygg stad for absolutt alle, seier ho.
