Christina (18) og dei andre ungdommane på bedehuset samla inn over to millionar til misjonen
– Ungdom i dag er opptekne av misjon, seier ung eldsjel.
Publisert
Sist oppdatert
Dei elleve siste åra har Christina Skrettingland (18) og 70 andre ungdommar frå Varhaug Kristelige Ungdomslag (VAKRU) samla inn om lag 200.000 kroner kvart år til misjonen.
Det var Jærbladet som først omtalte saka.
Annonse
Dei fleste ungdommane er berre 13 til 18 år.
Koden til eit vellukka innsamlingsarbeid har dei likevel knekt for lengst.
Lita bygd, stort engasjement
– 100 kroner er lite i Noreg, men vanvitig mykje på Madagaskar, seier Skrettingland.
Den vesle jærbygda, Varhaug, tel ikkje fleire enn 3.340 innbyggjarar, men har misjonsvener i alle aldrar.
– Ungdom i dag er opptatt av misjon, fastslår 18-åringen.
VAKRU arrangerer årlege basar, auksjon og flaskeinnsamling til inntekt for dei to misjonsprosjekta.
Dei har og arrangerer bedehuskveldar med åretrekning og dugnadar, der dei set opp party-telt og serverer i selskap.
Annonse
Alle inntektene går til KPK Ukraina og Jordbruksskolens Venner.
– Kva er det som driv dykk?
– Det er veldig motiverande å reise ned og besøkje misjonsprosjekta sjølv. Då ser me kor stor verknad pengane faktisk har, seier Skrettingland.
Dette motiverer ungdommane
Kvart år betaler Varhaug-ungdommane ein misjonstur til mottakarlanda.
I oktober reiste 20 ungdommar til Madagaskar og dei to jordbruksskulane dei støttar: Tombontsoa og Fihaonana, begge grunnlagt av Det Norske Misjonsselskap (NMS) i si tid, nå eigd og og drive av Den gassisk-lutherske kyrkja (FLM).
Dei gassiske jordbrukselevane er jamgamle med bedehusungdomane frå Varhaug. Mange av dei deler interessa for landbruk og fotball.
– Det er mykje meir givande å samle inn til folk på vår eigen alder, seier Skrettingland.
Annonse
Bøn og arbeid
Dei to jordbruksskulane lærer bort effektivisering i landbruket, i tillegg til å drive kyrkjeleg og sosialt arbeid. Mottoet til skulane er «be og arbeid» – eit ideal som også var sentralt i pietismen som lenge prega bygdene på Jæren.
På Madagaskar fekk Varhaug-ungdommane sjølv prøve seg som jordbrukselevar då dei besøkte skulane.
På timeplanen stod risplanting og kaffiplanting.
– Kva var det viktigaste de lærte på turen?
– Å sjå kor store forskjellar det er på liva til norske og gassiske ungdommar. Dei har så lite. Likevel klarer dei seg, og er alltid så glade, seier Skrettingland.
– Kva skal tips har du til andre som vil mobilisera ungdom til misjonsarbeid?
– Ha eit prosjekt du kan besøkje, så folk får sjå kva pengane går til. Arrangerer kjekke ting, som til dømes flaskeinnsamling. Sjølv om det er dugnad, synest folk det er gildt for når ein har same mål, gjer det ilag og et pizza saman, seier den unge misjonskvinna.
