Difor trur ikkje rabbinaren at Jesus er Messias

Det finst 2,3 milliardar kristne over heile verda, ifølge Store norske leksikon. Snart skal dei feira at Messias blei født i ein stall i Betlehem for over 2000 år sidan.

Joav Melchior er ikkje ein av dei.

Han er rabbinar i Det Mosaiske Trossamfund i Oslo og ventar framleis på den dagen Messias skal komme.

I søndagens tekst spør Døyparen Johannes kven Jesus er.

Johannes i fengsel

Johannes sat sannsynlegvis fengsla i dagens Jordan da han sende nokre disiplar for å spørje Jesus om han er «den som skal komme».

Uttrykket kan tolkast som Messias.

Døyparen ville spørje om det var Jesus.

Messias

Melchior seier det er avgrensa kor mykje det står om Messias i dei jødiske skriftene.

Toraen omtalar i liten grad fenomenet, men ein finn litt om det i profetbøkene og Talmud.

Jødane trur det skal vere ein etterkommar av Kong David som skal vidareføre arva etter han.

Dei fleste jødar er ikkje opptatt av korleis fenomenet konkret vil tre fram, men fokuserer meir på kva dei kan gjere for å framskunde det. Rabbinaren er usikker på korleis det heile vil utspele seg, men trur Messias sannsynlegvis vil vere eit menneske.

Messianske dagar

I kristendommen fokuserer ein meir på fenomenet enn i jødedommen.

Dei bryr seg i større grad om kva som vil skje når Messias kjem, framfor kven han er. Når det skjer vil det oppstå noko Melchior kallar «messianske dagar».

Det vil vere ei tid som er mykje betre enn i dag, der dei jødiske levereglane, «Guds etikk», har spreitt seg over heile jorda.

– Det vi på hebraisk kallar shalom vil ha breitt om seg i verda, ein heilskap der alle har funne sin plass utan at det går utover nokon andre, seier Melchior.

Ting som liding, krig og misunning vil opphøyre.

Kvifor er ikkje Jesus Messias?

Målestokken for om det er ein ekte eller falsk Messias er kor vidt det har oppstått slike messianske dagar.

Den utvalde ser Melchior for seg at kan vere den politiske eller religiøse leiaren som fører oss inn i ein slik tilstand.

Difor trur han kristendommen tar feil om Jesus.

– Det er gått over 2000 år og verda har ikkje blitt ein mykje betre stad. Hadde Jesu leiarskap ført til fred, forsoning og shalom hadde det vore ein heilt annan sak.

I jødedommen har det stått fram fleire falske messiasar, men Melchior er ikkje bekymra for om han sjølv vil ta feil.

– Dersom det er ein ekte Messias vil alle forstå det.

Trua og håpet

Ein må ikkje forveksle det at jødane ikkje fokuserer på Messias med at han er uviktig.

– Vårt ansvar er å gjere det vi kan for å nærme oss dei messianske dagane. Det viktige er ikkje kven som skal føre oss dit, men at verda ein dag skal bli slik, seier Melchior.

Håpet om at det kjem ei betre tid står sentralt.

Ein jødisk familie som var på veg mot deira eigen død i ein av Holocausts konsentrasjonsleirar gjekk og song om at Messias ein dag skal komme.

– Det er ei ekstrem beskriving av korleis vi må halde fast på trua og håpet om betre dagar sjølv når ting er som mørkast.

– Det er nesten slik at trua er viktigare enn Messias sjølv, seier rabbinaren.

Messias´ komme

Melchior vil ikkje spekulere for mykje i når Messias kjem, men er usikker på om det vil skje med det første slik situasjonen i verda er no.

– Det er ikkje mi oppgåve å vite når det skjer. Vi har venta i fleire tusen år, og kanskje må vi venta enno lenger.

Han ser samtidig nokre teikn på at verda bevegar seg mot dei messianske dagane.

– Ein av dei største jødiske filosofane seier at når Israels-folket vender tilbake, vil den som er leiar vere ein sannsynleg Messias.

– Kva vil skje etter Messias har komme?

– Det er vanskeleg å beskrive i detalj. Det blir ei ny verd, men naturlovane vil nok ikkje endre seg. Eg håpar å ein dag få oppleve det sjølv, seier han.