Her må ateistar ha det litt vanskeleg

Den første søndagen i september hadde eg ein intervjuavtale med ein av pastorane i The Brooklyn Tabernacle i New York. Det var før den første av dei to tidlege gudstenestene i kyrkjelyden. Den startar kl. 09.00. Eg måtte tidleg opp for å kome meg under elva med t-banen frå Manhattan i tide.

Trongt ved podiet

Tidleg ute bør ein uansett vere dersom ein skal få god plass i det gamle teateret der kyrkjelyden held til. Jim Cymbala (80) har vore hovudpastor heilt sidan 1971 og er framleis prega av evangelisk glød. Talen tok utgangspunkt i historia om Josef i Det gamle testamentet og vart avslutta med innbyding til omvending og forbøn. Med plass på første rad kunne eg konstatere at det vart trongt framme ved podiet.