Kva er ein konservativ kristen?

Kva inneber det å vere konservativ, og kvifor skal ein eventuelt vere det? Det er nokre av spørsmåla som vert diskuterte når Dagen-kommentator Sofie Braut er gjest i den nyaste episoden av podkasten Tore og Tarjei.

Bakgrunnen er mellom anna brytningar mellom det som gjerne vert kalla teologisk konservative og teologisk liberale i forskjellige kyrkjesamfunn, men også generelt ei konservativ livshaldning.

Har det noko med ei kristen livshaldning å gjere?

Ikkje eit livslangt dementi

For Braut er det med tida blitt meir verdifullt å identifisere seg som konservativ. Men det vil ho gjere på ein avslappa måte.

– Livet kan bli eit einaste langt, samanhengande dementi. Ein endar liksom opp med å prøva å få alt heilt rett, og aldri bli misforstått. Eg vil ta det med litt godt humør at folk oppfattar meg som litt typisk konservativ, seier ho.

Utfordringa er etter hennar vurdering å fylle omgrepet konservativ med innhald. Som parallell nemner ho opplevinga med å ta fram eit glas syltetøy midt på vinteren.

– Når ein konserverer, har ein teke vare på den gode smaken, påpeikar ho.

Djup takksemd

Ei slik livshaldning meiner ho dreiar seg om noko langt meir og djupare enn å vere gammaldags.

– Det handlar om å ta vare på, bevare og vere takksam.

Ho legg til at dette ikkje inneber å vere imot all forandring.

– Det er ikkje mogleg å tenkje seg livet eller eigen person som noko statisk. Målet er ikkje å vere uforanderleg.

Bibelen som kanon

Braut meiner det avgjerande er at ein tek tid til å spørje seg om det er gode grunnar for endring og korleis denne i så fall bør skje.

– Eg vil tenkje at Bibelen er Guds ord og kanon, altså ei rettesnor, i mitt liv. Eg vil konsultere kva den seier og la han vera gullstandard for tanken. Det hjelper meg å halde tak i ein del ting når samfunnet endrar seg og eg endrar meg. Som konservativ eller bibeltru kristen har eg framleis Bibelen som autoritet, seier ho.

Gjenklang blant folk flest

I eit meir omskifteleg og individualisert samfunn innser Braut at kristne i større grad enn før må kunne argumentere for standpunkta sine, både for eigen del og overfor andre. Då trur ho det er viktigare å lære av tradisjonen enn av reklame og trendar.

– Å seie at det er «gøy med noko nytt» er eit vanvitig godt salstriks, men det er utruleg mykje som er verdt å ta vare på. Eg er veldig frimodig på det, og meiner det vekkjer ein grunnleggjande gjenklang blant folk. Når vi ser oss tilbake i takksemd, får vi til dømes eit nådefullt blikk på våre eigne foreldre. Og det håper eg borna mine vil ha på meg som mor, seier ho.

Denne sida ved konservatismen saknar ho meir merksemd rundt i den offentlege samtalen.

Heile samtalen kan du høyre i Spotify, iTunes og andre tenester som leverer podkast. Han ligg også på dagen.no