Metodistkyrkja i Noreg ligg an til å opne for likekjønna vigsel
Dermed kan kyrkjesamfunnet bli den første frikyrkja i Noreg som følger etter Den norske kyrkja.
Publisert
Sist oppdatert
Om kort tid samlar Metodistkyrkja sitt «kyrkjemøte» seg i Larvik.
Kyrkjesamfunnet har i fleire tiår diskutert likekjønna samliv.
Annonse
Men når sakspapira til møtet nyleg blei publisert, låg det eit forslag, sendt inn frå Metodistkyrkja i Drammen og Harstad, som kan sjå ut til å løyse den årelange konflikten.
Dei foreslår nemleg å vedta at «to av samme kjønn som ønsker å gifte seg i Metodistkirken i Norge, skal få lov til det i den menigheten de selv ønsker.»
– Mange vil forlate
Tom G. Johnsen er prest i Metodistkyrkja på Sotra og er skuffa over forslaget om å opne for likekjønna vigslar.
– Eg synest ikkje noko om det. Det gjer det jo ikkje så enkelt å vere ein del av kyrkja. Eg har lova å tenestegjere i 50 prosent i eit år til, men om eg blir verande til neste år igjen, er ikkje sikkert, seier han.
Presten fryktar at dette vil føre til at fleire av soknebarna hans vil søke seg til andre samanhengar.
– Det er fleire som ikkje ser ei framtid i Metodistkyrkja i Noreg, seier han.
Samtidig understrekar Johnsen at den nasjonale delen av Metodistkyrkja ikkje har mynde til å vedta slike teologiske endringar.
Annonse
Dei nasjonale metodistkyrkjene er nemleg underlagt det øvste, internasjonale organet i trussamfunnet, Generalkonferansen (sjå faktaboks).
Men dersom Generalkonferansen i 2024 opnar for likekjønna vigsel, kan Metodistkyrkja i Noreg bli den første frikyrkja i Noreg som følger etter Den norske kyrkja.
– Eit fint forslag
Hilde Marie Øgreid Movafagh er rektor for Metodistkyrkja sitt teologiske seminar ved MF vitskapeleg høgskole i Oslo. Ho er positiv til forslaget.
– Det eg likar best er at lokale kyrkjelydar går saman om å bidra konstruktivt inn i situasjonen og sette ord på det spennet vi lever i, seier ho.
Forslaget som er sendt inn kom på bakgrunn av at trussamfunnet sin biskop i Norden og Baltikum nyleg uttalte at Metodistkyrkja i Noreg snart ville opne for likekjønna samliv.
Øgreid Movafagh er likevel einig i at det ikkje er beint fram kva konsekvensar eit slikt vedtak vil få.
– Det vil ikkje ha praktiske konsekvensar. Dette er ei erklæring, og ei erklæring kan ikkje overprøve lovverket. Dersom ein vier eit likekjønna par vil det framleis vere ein internkyrkjeleg sivil ulydnad, forklarar ho.
Annonse
Samtidig trur ho forslaget er med å sette retning for Metodistkyrkja i Noreg .
– Det kan vere ein god ting sjølv om vi strevar med det juridiske. Det vil vere eit sterkt og tydeleg symbol på kvar vi er.
Dagen har prøvd å få tak i dei to tilsynsprestane i Metodistkyrkja i Noreg. Vi har ikkje lukkast med å få tak i Knut Refsdal. Ingull Grefslie hadde ikkje tid til å kommentere saka.
