Norsk studie: Leir er ein nøkkel til personleg omvending for unge kristne
For Kristian vart ein samtale under ein leirkveld starten på vegen tilbake til trua.
Publisert
Sist oppdatert
Sommar er høgsesongen for kristne leirar, men nyleg kunne Dagen melde at fleire misjonsorganisasjonar må avlyse på grunn av mangel på frivillige leiarar.
Det kan vise seg å få stor betydning for rekrutteringa av unge menneske.
Annonse
Ny forsking tyder nemleg på at opplevingar unge har på leir er ein av dei mest avgjerande faktorane for at dei tar eit bevisst val om å bli kristne.
Blir du med på leir?
Ein av dei som har opplevd at livet tok ei ny retning på leir er Kristian Bønes Yndestad. Han er pastor i ImF-forsamlinga Betlehem i Bergen.
Yndestad vaks opp i Levende Ord, like utanfor Bergen, og var aktiv der gjennom store delar av barndommen.
Men i byrjinga av tenåra, trakk han seg lengre og lengre unna det kristne miljøet.
Ei spesiell oppleving skulle likevel få han tilbake på rett spor igjen.
16 år gammal sat Yndestad på rommet sitt, då han høyrer faren rope inn til han:
«Kristian! Blir du med på leir i sommar?»
Annonse
– Eg opplevde det som å bli stilt overfor eit val: Skulle eg seie «ja» og gå inn i det kristne miljøet igjen eller skulle eg seie «nei» og trekke meg heilt ut?
Yndestad bestemte seg for seie «nei».
Men då han opna munnen sin, høyrde han seg sjølv seie: «Ja, eg blir med!».
– Eg veit ikkje kva som skjedde – kanskje det var Gud som la orda i munnen min. Eg er i alle fall utruleg glad for at det blei slik, seier han.
Eit vendepunkt
Då sommaren kom, gjekk nemleg turen til Søgne og leiren Pitstop, som vart arrangert av Oasen menighet.
Det skulle bli eit vendepunkt på Yndestad si trusreise.
Etter eit kveldsmøte kom han i prat med ein av forbedarane. Han kan ikkje hugsa i detalj kva som blei sagt, men kan hugse at han fekk snakka ærleg om livet og at dei bad saman.
Annonse
Etter samtalen sat Yndestad igjen med ei sterk oppleving av at han trong Gud i livet sitt.
– Eg hadde tatt nokre aktive steg vekk frå trua i løpet av tenåra, og her fekk eg sett ord på det i ein setting der ein fokuserte på Gud, så for meg vart det veldig spesielt, seier han og legg til:
– Det vart starten på vegen min tilbake til trua og det kristne miljøet. Eg opplevde det nok som ei slags omvending.
I etterkant har Yndestad vore på mange leirar som har betydd mykje for han, men denne leiren står framleis i dag, over 15 år seinare, igjen som eit av dei viktigaste punkta i hans trusreise.
I seinare tid har Yndestad tatt ein master i teologi ved Fjellhaug høgskole i Oslo, og begynte i fjor i jobben som pastor i Bergens indremisjon.
– Eg veit ikkje kva som ville skjedd om eg ikkje var på den leiren, men den blei i alle fall veldig viktig for meg, seier han.
Studien
Roald Zeiffert er høgskulelektor og stipendiat ved Høyskolen for ledelse og teologi i Oslo. Han har forska på kva som er dei viktigaste årsakene for at unge menneske opplever å ha tatt eit bevisst val om å bli kristen.
Annonse
Eller som han seier i artikkelen: Opplever å få ei personleg omvending.
Studien er ein del av doktorgraden til Zeiffert og baserer seg i første rekke på ei spørjeundersøking mellom 661 unge menneske mellom 15–25 år som er knytt til ulike bedehus- og frikyrkjemiljø i Norge, og dessutan gruppeintervju.
I studien kjem det fram at noko av det mest sentrale for at desse har tatt eit personleg val om å bli kristen, er opplevingar dei har hatt på leir.
Den einaste faktoren som har vore viktigare, er relasjonen deira til mor. Mens den tredje viktigaste faktoren, er relasjonen til far.
Ein sentral strategi
Leir viser seg altså, forklarar Zeiffert, å vere ein heilt sentral strategi for å rekruttere unge i bedehus- og frikyrkjemiljøa, sjølv om mange av dei som har deltatt i studien har vakse opp i kristne familiar.
– Det er det sosiale fellesskapet kombinert med dei andelege opplevingane ein får på leir, som er noko av det som gjer at det slår så høgt ut.
– Samtidig så har ofte leiren ein viss dramaturgi som gjerne er bygd opp rundt at ein innbyr til frelse på kveldsmøtet, seier forskaren.
Annonse
Artikkelen der Roald Zeiffert presenterer funna er ikkje publisert endå, men Dagen har fått tilgang funna Zeiffert har gjort.
Viktig arbeid
Yndestad seier funna til Zeiffert gir god meining både personleg, men også i lys av kva han opplever skjer med ungdommar på leir.
– Det er noko med fellesskapet og fokuset ein kjem inn i på ein leirstad som er veldig spesielt, seier han.
Han trur rammene rundt leiren gjer at ein ofte kjem i ein annan modus der folk opnar seg meir for det åndelege.
– Det er ein stad der ein i fellesskap har sett av tid til å søke Gud, reflektere over kva ein vil med livet, over kva evangeliet er for noko, og over kva det vil seie å vere kristen, seier han og legg til:
– Det er ikkje sikkert den samtalen som vart så avgjerande for meg ville ha vore like viktig om den kom i ein annan samanheng enn på leir.
