Som når eit barn kjem heim om kvelden

Du hugsar kanskje kjensla: Det var vinter. Du hadde vore ute og leika litt for lenge. Væta surkla i skoa. Boblebuksa var tung av snø, og neglebitten brann i fingrane. Det siste vegstykket heim var så tungt å gå, at du hadde mest lyst til å legge deg ned.

Og hadde det ikkje vore for at det var så mørkt, hadde du kanskje teke ein pause for å få att pusten. Men skuggane som liksom levde i skogbrynet, gav deg hjartebank og jaga deg heimover.

Kor godt var det ikkje då, å kome inn i lyset og varmen heime i gangen. Få hjelp til å bli kvitt dei våte kleda og få ei skive med fårepølse og eit glas mjølk, før mor eller far pakka dyna rundt deg og sa god natt.